Prajekt «AirPhone — smartfon novaha pakaleńnia» vučnia 11-ha kłasa siaredniaj škoły №11 Słucka Uładzisłava Hadałava adznačany dypłomam III stupieni na mižnarodnym navukova-inžyniernym konkursie Intel International Science and Engineering Fair 2017 (Intel ISEF 2017), jaki prajšoŭ u Łos-Andželesie ( ZŠA). Pra heta karespandentu BiełTA paviedamili ŭ Minskim abłasnym instytucie raźvićcia adukacyi.
Pa vynikach konkursu prajekt navučenca sa Słucka taksama zavajavaŭ śpiecyjalny pryz ad amierykanskaj transnacyjanalnaj kampanii Oracle, jakaja źjaŭlajecca adnym z najbujniejšych vytvorcaŭ prahramnaha zabieśpiačeńnia ŭ śviecie i bujnym pastaŭščykom sierviernaha abstalavańnia. Kampanija śpiecyjalizujecca na vypusku sistem kiravańnia bazami dadzienych, złučnaha prahramnaha zabieśpiačeńnia i biznes-dadatkaŭ (ERP- i CRM-sistem, śpiecyjalizavanych halinovych dadatkaŭ).
U hutarcy z karespandentam kurjer.info Uładzisłaŭ Hadałaŭ raspavioŭ, što ŭjaŭlaje saboj jaho «AirPhone».
Na siońnia mahčymaści ŭsich smartfonaŭ, na dumku Uładzisłava, abmiežavanyja trojkaj samych papularnych mabilnych apieracyjnych sistem: Android, IOS i Windows Phone.
«Kali ŭziać toj ža Android, to jon vykarystoŭvajecca ŭ absalutna roznych smartfonach, što pryvodzić da najhoršaj aptymizacyi. Tym samym mahčymaści smartfona abmiažoŭvajucca jaho aparatnym zabieśpiačeńniem, a heta istotna pavialičvaje košt kampanientaŭ devajsa, — tłumačyć Uładzisłaŭ. — Naš ža «AirPhone» atrymajecca chutkim, tonkim, lohkim, a hałoŭnaje tannym za košt taho, što jon nie vykonvaje nijakich vyličalnych apieracyj, aproč apracoŭki atrymanaj hrafiki i huku. A heta značyć, my nie majem patreby ŭ mahutnym aparatnym zabieśpiačeńni i aŭtamatyčna źnižajem nahruzku na akumulatar. Takim čynam, abjom zajmanaj prastory ŭ korpusie, a taksama masa smartfona rezka źmianšajecca ŭ paraŭnańni ź inšymi fłahmanskimi madelami. Što tyčycca charaktarystyk smartfona, to jany taksama stanoviacca lepš, bo my možam zadać addalenamu siervieru absalutna lubyja aparatnyja mahčymaści».
Prava pradstaŭlać Biełaruś na mižnarodnym konkursie Intel ISEF Uładzisłaŭ Hadałaŭ zavajavaŭ pa vynikach nacyjanalnaha adboru (Belarus Science and Engineering Fair), dzie jon staŭ adnym ź pieramožcaŭ. Svaju pracu jon rychtavaŭ pad kiraŭnictvam nastaŭnika infarmatyki siaredniaj škoły №11 Słucka Uładzimira Žuka. U hetym hodzie ŭ Łos-Andželesie taksama prezientavała svoj prajekt «Sumnik jak pierśpiektyŭnaja syravina dla nacyjanalnaj farmakałohii i enierhietyki» navučenka 10-ha kłasa himnazii №1 Žodzina Alaksandra Kachaviec, jakaja taksama była pieramožcaj BelSEF.
Kamanda junych navukoŭcaŭ ź Biełarusi pradstaviła svaje pracy na Intel ISEF u piaty raz. Z 2013 hoda biełarusy na hetym prestyžnym mižnarodnym konkursie atrymlivajuć śpiecyjalnyja pryzy i dypłomy ad amierykanskich kampanij, fondaŭ i žury. Udzielnikami konkursu 2017 hoda byli 1700 adoranych dziaciej z 78 krain śvietu, jakija demanstravali svaje daśledavańni.
