Na piać chvilin skaracili pierapynak pamiž pieršaj i druhoj źmienami, kab zaniatki ŭ škołach mahli pačynacca paźniej, čym ciapier, i zakančvalisia da 19.30, jak naležyć pavodle SanPiN. Pra heta paviedamlaje TUT.BY sa spasyłkaj na intervju staršyni kamiteta pa adukacyi Minharvykankama Michaiła Mirončyk ahietstvu «Minsk-Naviny».
— Źmieny u sanitarnyja normy i praviły zakranuli niekalki pazicyj. U pryvatnaści, skaračeńnie pierapynku pamiž pieršaj i druhoj źmienami. Raniej pierapynak byŭ nie mienš za 20 chvilin, a ciapier nie mienš za 15. Za košt skaračeńnia atrymajecca źmianić hrafik druhoj źmieny tak, kab zaniatki zakančvalisia nie paźniej za 19.30, — adznačyŭ Mirončyk padčas pramoj linii ŭ redakcyi haziety «Viačerni Minsk».
— Źmieny ŭniesienyja i ŭstupajuć u siłu praz dva tydni z momantu padpisańnia dakumienta. Škoły pavodle ich buduć pracavać z 1 vieraśnia, — paćvierdziła zahadčyca adździaleńnia hihijeny dziaciej i padletkaŭ Respublikanskaha centra hihijeny, epidemijałohii i hramadskaha zdaroŭja Ała Małachava
Pa słovach Małachavaj, pamiž navučalnymi źmienami pavinna być nie mienš za 15 chvilin.
— Hetaha času dastatkova, kab paśpieć pravietryć i prybrać pamiaškańnie dla zaniatkaŭ. Pieramieny pamiž zaniatkami pavinny być pa dziesiać chvilin, akramia taho, nieabchodna praduhledzieć i nie mienš za dva pierapynki praciahłaściu nie mienš za 15 chvilin dla pryjomu ježy, dynamičnych pierapynkaŭ, — skazała Ała Małachava.
Pastanova, jakaja ŭnosić źmieny ŭ SanPiN, datavanaja 17 maja. U joj, u pryvatnaści, skasoŭvajecca vialiki pierapynak (30 chvilin) paśla druhoha ŭroka. Zamiest jaho zahadana ładzić nie mienš jak dva pierapynki daŭžynioj 15 chvilin za źmienu.
Nahadajem, 12 maja Łukašenka daručyŭ pierahledzieć hrafik raboty škoł. «Raniej za 9 ranicy ŭroki pačynać nie treba», — zajaviŭ Łukašenka.
Pavodle źmienienaha SanPiN, aptymalny čas pačatku zaniatkaŭ u škole — 9 ranicy. Navučalnyja ŭstanovy, jakija pracujuć u dźvie źmieny, razhladajuć varyjant pačynać zaniatki a 8.30 abo a 9-j, jakija pracujuć u adnu źmienu — a 9-j.
