Urad Biełarusi zaćvierdziŭ zadańnie pa eksparcie tavaraŭ i pasłuh u Kitaj na 2017-2020 hady. Heta praduhledžana pastanovaj Saŭmina ad 12 maja 2017 hoda № 347, piša Tut.by.
Saŭmin zaćvierdziŭ vykanańnie štohadovych zadańniaŭ pa eksparcie tavaraŭ i pasłuh u Kitaj na 2017-2020 hady ŭ jakaści klučavych pakazčykaŭ efiektyŭnaści pracy kiraŭnikoŭ respublikanskich dziaržorhanaŭ i inšych dziaržarhanizacyj, padparadkavanych uradu, abłvykankamaŭ i Minskaha harvykankama. Tak, u 2017 hodzie ekspart tavaraŭ i pasłuh u KNR pavinien skłaści 653 młn dalaraŭ, u 2018-m — 806,6 młn, u 2019-m — 1,06 młrd, u 2020-m — 1,5 młrd.
Najbolšy ŭkład pavinien zabiaśpiečyć Minabłvykankam: z 390 mł. dalaraŭ u 2017 hodzie da 930 młn dalaraŭ da kanca 2020 hoda. Na terytoryi Minskaj vobłaści znachodziacca «Biełaruśkalij», industryjalny park «Vialiki kamień» i budujecca jašče adzin kalijny kambinat. Na druhim miescy iduć pradpryjemstvy kancerna «Biełnaftachima», jakim daviedziena zadača pavialičyć ekspart z 60 młn da 155 młn dalaraŭ.
Kantrol za vykanańniem pastanovy ŭskładzieny na Ministerstva zamiežnych spraŭ.
Za 2016 hod tavaraabarot Biełarusi i Kitaja skłaŭ kala 2,6 młrd dalaraŭ. Pry hetym biełaruski ekspart skłaŭsia na ŭzroŭni 500 młn. dalaraŭ. Biełaruś pastaŭlaje ŭ Kitaj kalijnyja ŭhnajeńni, naftachimičnuju pradukcyju, kambajny, zapčastki dla karjernych samazvałaŭ, sielhastechniku i inšyja tavary.
Siońnia skončyŭsia vizit aficyjnaj biełaruskaj delehacyi na čale z Alaksandram Łukašenkam u KNR.
