13 maja ŭ Słucku 26-hadovy chłopiec vyrašyŭ padvieźci nieznajomku, jakaja «łaviła» transpart la haradskoha kafe.
U mašynie jany razhavarylisia, i 20-hadovaja spadarožnica pryniała prapanovu kiroŭcy praciahnuć znajomstva ŭ jaho doma.
Maładziony vypili, haspadar kvatery zasnuŭ. Hetym skarystałasia dziaŭčyna, jakaja zabrała klučy ad aŭtamabila i pajechała na im raźjazdžać pa vakolicach, — raspavioŭ načalnik kryminalnaha vyšuku Słuckaha RAUS Stanisłaŭ Čucholski.
Daloka źjechać z rajcentra nie ŭdałosia: pablizu vioski Łučniki mašyna złamałasia. Pierad tym, jak kinuć aŭto, dziaŭčyna abšukała sałon. Znojdzienyja hrošy, załaty piarścionak i navihatar jana zabrała sabie.
Pračnuŭšysia na nastupny dzień chłopiec sprabavaŭ samastojna znajści mašynu. Paśla biezvynikovych pošukaŭ pajšoŭ u milicyju. Nieŭzabavie dziaŭčynu zatrymali. Ciapier joj pahražaje da 5 hadoŭ pazbaŭleńnia voli.
Darečy, raniej dziaŭčyna ŭžo mieła sudzimaść za kradziež.
