Navi vystupali pad trecim numaram ź biełaruskamoŭnaj pieśniaj «Historyja majho žyćcia», u finale jany zaniali 17-je miesca. Jany kažuć, što vynik hałasavańnia ich nie zasmuciŭ. «My siońnia vyrašyli rassłabicca i atrymać zadavalnieńnie», - kaža Ksienija. Navi taksama raspaviadajuć, što pacałavacca padčas numara jany vyrašyli ŭsiaho za paru chvilin da vychadu.
Sam fakt svajho vystupu na «Jeŭrabačańni» Naviband ličać važnym dla kultury, biełaruskaj movy i moładzi. Arciom spadziajecca, što jany zmahli abjadnać biełarusaŭ.
«My chočam skazać «dziakuj» našaj Biełarusi za takuju padtrymku, za taki fłešmob. I Siarhiej Michałok śpiavaŭ našu pieśniu i niekalki dzion tamu nam telefanavaŭ Alaksandr Saładucha, što krychu nietypova», — raspaviadaje Arciom Łukjanienka.
Pry hetym u Navi niama płanaŭ vystupić na «Jeŭrabačańni» jašče raz. Arciom kaža, što jany chočuć zajmacca tvorčaściu i muzykaj. Mienavita muzyka, a nie šoŭ, siońnia pieramahła na konkursie.
«My vielmi radyja za Partuhaliju. My paśpieli ź im parazmaŭlać, jon vielmi ščyry čałaviek i jon pavinien byŭ być pieršym. I my vielmi chočam, kab u nastupnym hodzie da hetaha konkursu adnosilisia bolš lohka», - kažuć Arciom i Ksienija, jakija ŭžo 3 červienia vystupiać kala Minskaj ratušy.
