Vydatny polski linhvist Mirasłaŭ Jankoviak, daśledčyk biełaruskich havorak Vilenščyny i Łathalii, staŭ abjektam manipulacyi. Na partale Jeadailu jamu prypisali słovy, jakija jon nie kazaŭ. Pryčym prypisali, byccam by jon toje kazaŭ u intervju «Našaj Nivie».
Heta typovy pryjom dla rasijskich prapahandysckich partałaŭ, jakija vydajuć siabie za ŚMI. Prosta nielha daviarać ich materyjałam.
Pryvodzim tut list Mirasłava Jankoviaka.
«Šanoŭny redaktar «Našaj Nivy»,
źviartajusia da Vas ź infarmacyjaj, jakaja datyčyć vykarystańnia jak majho proźvišča ŭ roli śpiecyjalista ŭ halinie biełarusistyki, tak i nazvy Vašaj haziety rasiejskim nacyjanalistyčnym partałam Jeadailu, jakoha adzin z aŭtaraŭ — Kirył Aviarjanaŭ-Minski dazvoliŭ sabie napisać niapraŭdu, navat manipulacyju. Aŭtar śćviardžaje nibyta na asnovie intervju sa mnoj, raźmieščanaha ŭ vašaj haziecie takoje:
To jesť, ischodia iz słov pana Jankoviaka, «biełaruskaja litaraturnaja mova» — eto prostoriečnyj variant polskoho jazyka, charaktiernyj dla polakov Vilenŝiny.
Chaču padkreślić, što ja nikoli nie sfarmulavaŭ takoj tezy ŭ svaich artykułach, dy vystupleńniach i nie liču i nikoli nie ličyŭ, što biełaruskaja litaraturnaja mova — heta dyjalekt polskaha dyjalektu z-pad Vilni. Napisaŭ aŭtaru z prośbaj abo vydalić hety frahmient, jaki źjaŭlajecca niapraŭdaj, abo jaho pierafarmulavać. Spadar Aviarjanaŭ adkazaŭ mnie spačatku, što heta dakładnaja cytata z «Našaj Nivy», a paśla majoj reakcyi, što heta niapraŭda, napisaŭ mnie, što heta jaho interpretacyja maich słoŭ i mnie ničoha da taho. Na majo pytańnie, ci jon zajmajecca žurnalistykaj, manipulacyjaj ci ideałohijaj atrymaŭ ad jaho adkaz, što «zastaniemsia pry viersii, što zajmajecca ideałohijaj».
Artykuł spadara Aviarjanava maje antybiełaruski charaktar, jon choča prymienšyć rolu biełaruskaj litaraturnaj movy i pakazać, što jana nie źjaŭlajecca samastojnaj movaj, a dyjalektam rasiejskaj ci polskaj movy. Pry hetym dazvalaje sabie vykarystać Vašu hazietu i majo proźvišča robiačy manipulacyju. Napisaŭ pa hetaj spravie taksama hałoŭnamu redaktaru partała, jaki da siońnia mnie nie adkazaŭ
Z pavahaj, Mirasłaŭ Jankoviak».
