Pracoŭny dzień daŭno skončany, ale supracoŭniki adnoj bujnoj kampanii ŭ Kapienhahienie praciahvajuć siadzieć za rabočymi stałami. Zvyšuročnyja hadziny dla ich norma. Voś tak pracavać maładomu śpiecyjalistu Madsu Bluchieru zusim nie chaciełasia. Ciapier jon kiruje nievialikaj, ale ŭłasnaj firmaj Translated By Us. I pracujuć tut sapraŭdy pa-inšamu: paśla šaścihadzinnaha dnia kožny z supracoŭnikaŭ moža iści dadomu — zarpłatu jamu naličvajuć za ŭsie vosiem hadzin.
Getty
«Kali pracavać daŭžej, heta zusim nie značyć lepš», — razvažaje Mads Bluchier u intervju DW. Hetyja dźvie hadziny dla startapa zusim nie straty, padkreślivaje jon. Chutčej, naadvarot: ścisnuty pracoŭny dzień prymušaje kancentravacca na samym važnym i pracavać bolš efiektyŭna.
Kožnuju ranicu ŭsia kamanda družna abmiarkoŭvaje asnoŭnyja zadačy dnia. «Heta stvaraje pazityŭnuju atmaśfieru, bo kožny dakładna viedaje, što ad jaho čakajecca», — tłumačyć 34-hadovy pradprymalnik. Zrabiŭ spravu — i možna sa spakojnaj dušoj iści dadomu, zajmacca ŭsim, što pažadaješ.
Šeść hadzin — novyja vosiem?
Kaniec rabočaha dnia nieŭzabavie paśla abiedu — šmat kamu heta zdajecca ŭtopijaj. Vyniki apošnich daśledavańniaŭ pakazvajuć, što amal pałova pracoŭnych u Hiermanii pakutuje ad pastajannaha pieranapružańnia na pracy. Hałaŭnyja boli, biessań i emacyjnaje źniasileńnie až da depresii — takija simptomy naściarožvajuć. Ale ci hatovyja pracadaŭcy niešta źmianić?
Firma Translated By Us zusim nie pieršaja łastaŭka, što tyčycca skaročanaha pracoŭnaha dnia. Mnohija pradpryjemstvy ŭ krainach Jeŭropy i Skandynavii vyrašyli aprabavać hetak pryvabnuju madel. Aŭtazavod Toyota ŭ Hiotebarhu skaraciŭ pracoŭnyja źmieny 15 hadoŭ tamu — rabočyja zadavolenyja, a zavod atrymlivaje adčuvalny prybytak. Na praciahu dvuch hadoŭ pa skaročanym hrafiku pracavali i supracoŭniki adnaho z damoŭ sastarełych u tym ža horadzie. Praŭda, tut ź finansavaha boku prajekt akazaŭsia biesprybytkovym, i ad novaj madeli pracoŭnaha hrafika daviałosia admovicca. Što ž tyčycca supracoŭnikaŭ, jany ź vialikim entuzijazmam stavilisia da svajoj pracy i byli značna bolš uvažlivymi da pacyjentaŭ.
Tak što ž važniej — zdarovyja, zadavolenyja svajoj pracaj supracoŭniki abo skaračeńnie vydatkaŭ? Ci razumna pieravieści ŭsich biez vyklučeńnia na šaścihadzinny pracoŭny dzień?
Viecier pieramienaŭ
Nie. Adkaz supracoŭnika Instytuta daśledavańnia pierśpiektyŭ rynku pracy Vierniera Ajcharsta hučyć bolš čym aćvieradžalna. «Heta nie panaceja i nie niejki hienieralny pryncyp, jaki možna ŭkaranić na praktycy paŭsiudna i ŭ samyja karotkija terminy», — zajaŭlaje ekśpiert u intervju DW. Niama nijakaj harantyi, što abjom pracy, raźličany na vosiem hadzin, budzie vykanany za šeść, nastojvaje Viernier Ajcharst. Kali ŭsia kraina piarojdzie na skaročany pracoŭny dzień, ličyć jon, u pieršuju čarhu pacierpić ekanomika. Spatrebicca bolš rabočych, a značyć, srodkaŭ dla zarobku. «Chutčej za ŭsio, źjavicca i vostry niedachop śpiecyjalistaŭ», — papiaredžvaje ekśpiert.
Zrešty, dla niekatorych pradpryjemstvaŭ taki pracoŭny dzień całkam prymalny, zhadžajecca jon. «U ciapierašni čas iduć haračyja dyskusii ab tym, što takoje praca, jaki čas pavinien być adviedzieny dla adpačynku, dzie miežy nahruzki», — kaža Viernier Ajcharst. Pavodle jaho słoŭ, u Hiermanii paniaćcie kłasičnaha vaśmihadzinnaha pracoŭnaha dnia pastupova sychodzić, mnohija firmy ŭvodziać volny hrafik, dazvalajuć supracoŭnikam pracavać z doma. A niekatoryja pracadaŭcy naohuł kasujuć abaviazkovyja hadziny pracy, dazvalajučy supracoŭnikam samim vyrašać, kali im zručniej spraŭlacca z pastaŭlenaj zadačaj.
Usio zaležyć ad profilu pradpryjemstva, ličyć Dekłan Kašyn z veb-ahienctva Potato. Supracoŭniki ahienctva pracujuć u Łondanie, Brystali, San-Francyska i inšych haradach śvietu. Stroha rehłamientavanych hadzin pracy ŭ ich niama, bo hałoŭnaje — vynik. U hetaj firmie Dekłan Kašyn usiaho čatyry miesiacy, ale svaje vysnovy jon užo zrabiŭ.
«Pik pracazdolnaści ŭ roznych ludziej u rozny čas», — razvažaje jon. I heta ŭ intaresach firmy — jak maha bolš efiektyŭna vykarystoŭvać pracoŭnyja resursy, dadaje jon. Raniej Dekłan Kašyn pracavaŭ žurnalistam, nienarmavany pracoŭny dzień jamu vielmi dobra znajomy. Ciapier jamu značna lahčej płanavać svoj čas, čarhujučy pracu z adpačynkam.
Hnutkija madeli arhanizacyi pracy pryvabnyja dla maładych śpiecyjalistaŭ. Užyvajučy ich, pracadaŭcy spadziajucca abyjści kankurentaŭ u baraćbie za talenty. A kali z dapamohaj skaročanaha pracoŭnaha dnia možna damahčysia bolšaha prybytku dla pradpryjemstva i paŭnavartasnaha, ščaślivaha žyćcia dla supracoŭnikaŭ, to całkam mahčyma, što ŭ biznesie takaja źjava budzie ŭsio mienš unikalnaj.
