Biełarusi cikavy vopyt dziaržaŭnych pieraŭtvareńniaŭ u Kazachstanie. Pra heta Alaksandr Łukašenka zajaviŭ siońnia na sustrečy sa staršynioj Mažylisa parłamienta Kazachstana Nurłanam Nihmatulinym.
«Vielmi časta naziraju, analizuju, sprabuju vyvučyć dośvied dziejnaści (asabliva apošnich miesiacaŭ) vašych vyšejšych orhanaŭ ułady, pierš za ŭsio prezidenta. Nam hety vopyt vielmi karysny, - zajaviŭ kiraŭnik dziaržavy. — My sapraŭdy vielmi surjozna i ŭvažliva vyvučajem vaš dośvied. Dumaju, što dla Kazachstana heta vielmi važnyja kroki, jakija vy robicie ŭ imia, pierš za ŭsio, zachavańnia stabilnaści i niezaležnaści vašaj dziaržavy».
«Vy sprabujecie ŭsialakija reformy, asabliva pa dziaržaŭnym ładzie, źmianieńni Kanstytucyi abaviazkova padmacoŭvać kankretnymi ekanamičnymi krokami. Heta vielmi važna. Heta dobry prykład dla inšych», — padkreśliŭ biełaruski lidar.
Pavodle słoŭ Alaksandra Łukašenki, samo źmianieńnie Kanstytucyi i pieradača paŭnamoctvaŭ ad prezidenta, naprykład, uradu, jak heta adbyvajecca ŭ niekatorych respublikach, moža časam vyklikać niezadavolenaść ludziej. «A kali ludziam havoryš, u imia čaho heta robicca, i padmacoŭvaješ kankretnymi faktami i zadačami na pierśpiektyvu - heta zusim inšaje. Voś heta inšaje jakraz charakterna dla vas. I vy małajcy, što ŭ hety składany dla ŭsich čas zachoŭvajecie adzinstva krainy», — skazaŭ jon.
Kiraŭnik dziaržavy adznačyŭ, što ŭ rehijonach, dzie znachodziacca jak Biełaruś, tak i Kazachstan, składvajecca niaprostaja situacyja. «Vakoł adbyvajucca ciažkija padziei. Viadoma ž, spakojnaha žyćcia ni vam, ni nam nichto nie daść, — skazaŭ jon. — Zrazumieła, što ŭsie chvali tak ci inakš na nas nakatvajuć. My taksama heta razumiejem i viedajem, nakolki niaprosta ciapier i Kazachstanu ŭ tym liku, asabliva ŭ toj čas, kali asnoŭny naš partnior pieražyvaje niaprostyja časy. A jašče tut nakładvajecca i pieradvybarnaja kampanija ŭ Rasii (nastupnyja prezidenckija vybary ŭ Rasii pavinny adbycca ŭ 2018 hodzie).
«My vielmi pieražyvajem za naša abjadnańnie, našy krainy. Navat u bližejšaj pierśpiektyvie. Ja ŭžo nie havaru ab stratehičnych niejkich pytańniach», — dadaŭ Alaksandr Łukašenka.
Jon taksama adznačyŭ, što niadaŭna abmiarkoŭvaŭ z prezidentam Kazachstana Nursułtanam Nazarbajevym pytańni ŭzajemaadnosin. «Kali ŭsio narmalna składziecca, my sustreniemsia ŭ vas na ŠAS (samit Šanchajskaj arhanizacyi supracoŭnictva), na «EKSPA», - skazaŭ jon.
Havoračy ab majučaj adbycca mižnarodnaj vystaŭcy «EKSPA-2017» u Astanie, Łukašenka nazvaŭ jaje znakavaj padziejaj u ekanomicy krainy, a taksama ŭ płanietarnym maštabie. «Viedaju, jak vy rychtavalisia ŭ hety znoŭ ža niaprosty čas. Mnohija ciapier admaŭlajucca ad takich mierapryjemstvaŭ. Toje, što Kazachstan uziaŭ na siabie hetu funkcyju i pastupova hod ad hodu rychtavaŭsia… Heta sapraŭdy padzieja», — adznačyŭ biełaruski lidar.
Jon taksama zajaviŭ, što ŭ Biełarusi rady tamu, što Kazachstan udzielničaje va ŭrehulavańni kanfliktaŭ, jakija adbyvajucca ŭ śviecie, stanovicca placoŭkaj dla pierahavoraŭ.
Alaksandr Łukašenka dadaŭ, što pryjezd Nurłana Nihmatulina ŭ Biełaruś budzie sadziejničać nie tolki raźvićciu mižparłamienckaha supracoŭnictva, ale taksama pahłybleńniu adnosin pamiž krainami ŭ cełym.
«Raboty šmat. My zaŭsiody z Nursułtanam Abišavičam havorym ab tym, što jak by my tut ni ŭpiralisia, ni staralisia, tavaraabarot u nas i ŭ Jeŭrazijskim ekanamičnym sajuzie, i pamiž dźviuma krainami, na žal, padaje. Hetyja słabyja miescy vyznačany. Treba pa hetych napramkach pracavać, — padkreśliŭ Alaksandr Łukašenka. - Tamu što ekanomika - heta asnova i fundamient adnosin pamiž dziaržavami. Kali niama handlova-ekanamičnych suviaziej abo, bolš taho, jany razburajucca, heta nikudy nie varta. Treba prykładać samyja surjoznyja namahańni dla taho, kab ich adnavić».
U svaju čarhu Nurłan Nihmatulin padziakavaŭ Alaksandru Łukašenku za mahčymaść sustrecca. «My heta razhladajem jak znak hłybokaj pavahi nie tolki da parłamienta Kazachstana, a pierš za ŭsio da našaha prezidenta i ŭsiaho kazachstanskaha naroda. Ja vam pieradaju vialikaje i ciopłaje pryvitańnie ad Nursułtana Nazarbajeva, jaho ščyryja pažadańni vam asabista i ŭsiamu biełaruskamu narodu praćvitańnia i dalejšych vialikich pośpiechaŭ», - skazaŭ jon.
Nurłan Nihmatulin adznačyŭ, što ŭ hetym hodzie Biełaruś i Kazachstan adznačajuć 25-hodździe ŭstanaŭleńnia dypłamatyčnych adnosin. Za hetyja hady pamiž krainami ŭstanavilisia vielmi ciesnyja kantakty — i pierš za ŭsio dziakujučy kiraŭnikam dźviuch dziaržaŭ.
Jon vykazaŭ upeŭnienaść, što aficyjny vizit Nursułtana Nazarbajeva ŭ Biełaruś, jaki zapłanavany na vosień biahučaha hoda, pryŭniasie svoj układ u raźvićcio dvuchbakovych adnosin.
