Deputat Pałaty pradstaŭnikoŭ Hanna Kanapackaja vyrašyła pačać «baraćbu ź biaźmiežžam i biezzakońniem, jakija tvoracca ŭ našaj krainie» i abviaściła pra stvareńnie Fondu dapamohi paciarpiełym padčas mirnych vuličnych akcyj. Praź jaho jana źbirajecca sabrać hrošy na apłatu štrafaŭ tym, kaho asudzili za ŭdzieł u mirnych akcyjach pratestu suprać padatku na darmajedstva.
Hanna Kanapackaja sa złamanaj nahoj na Maršy niedarmajedaŭ u Minsku 15 sakavika. Fota Dźmitryja Bruško.
«Asabista ja dvojčy źviartałasia ŭ Administracyju prezidenta, i dva razy atrymlivała nievyraznyja adpiski. Takija ž adpiski atrymlivali ad dziaržorhanaŭ i inšyja hramadzianie i arhanizacyi», - skazała Hanna Kanapackaja.
Na dumku deputata, dekret № 3 źjaŭlajecca niespraviadlivym i niezakonnym, bo parušaje Kanstytucyju. Jana ličyć, što pierad tym, jak vyjści na vulicu, ludzi vykarystoŭvali ŭsie zakonnyja srodki dla admieny dakumienta. Ale ŭłada ni da kaho nie prysłuchałasia.
«Ułada sama stvaryła siońniašniuju situacyju, rezka pavialičyŭšy sacyjalnaje napružańnie i pratestnyja nastroi ŭ hramadstvie. Vynikam stali masavyja mirnyja vuličnyja akcyi pratestu, jakija achapili ŭsiu krainu. Ułada strymlivałasia da apošniaha, ale znoŭ sarvałasia ŭ bałota brutalnych aryštaŭ i niesuraźmiernaha prymianieńnia siły», - prakamientavała Hanna Kanapackaja zatrymańni ŭdzielnikaŭ Maršaŭ niedarmajedaŭ.
Za ŭdzieł u akcyjach pratestu tolki aktyvisty Abjadnanaj hramadzianskaj partyi, u jakoj znachodzicca Hanna Kanapackaja, atrymali štrafaŭ na 5 tysiač rubloŭ. Akramia taho, pa ŭsioj krainie aryštavali bolš za sotniu čałaviek, u tym liku lidaraŭ apazicyi.
Usie sabranyja narodnyja srodki deputat nakiruje na vypłatu štrafaŭ asudžanym za ŭdzieł u pratestach.
«Štotydniovyja spravazdačy pa ruchu srodkaŭ buduć publikavacca na majoj staroncy ŭ Facebook. Pa zaviaršeńni raboty Fondu ŭsie srodki, što zastalisia ŭ im, buduć pieradadzienyja dziciačamu domu», - skazała Hanna Kanapackaja.
