Homielskaha piensijaniera sprabavali abkraści dvojčy za miesiac, paviedamili va UUS Homielskaha abłvykankama.
U pačatku lutaha ŭ kvateru da 98-hadovaha homielskaha piensijaniera pastukalisia try žančyny niesłavianskaj źniešnaści. Jany skazali, što zajmajucca zboram achviaravańniaŭ dla majučych patrebu. Dziadula zaprasiŭ nieznajomak da siabie i prapanavaŭ harbatu. Pakul adna ź ich adciahvała ŭvahu haspadara, inšyja abšukvali kvateru ŭ pošukach materyjalnych kaštoŭnaściaŭ. Adnak davieści svoj złačynny namier da kanca nie zmahli. Piensijanier skazaŭ, što z chviliny na chvilinu čakaje ŭ hości svajakoŭ. Daviedaŭšysia pra heta, machlarki tut ža syšli. Paśla ich sychodu dziadula zajšoŭ u pakoj i ŭbačyŭ biesparadak siarod asabistych rečaŭ. Supracoŭnikam kryminalnaha vyšuku daviałosia pravieści karpatlivuju pracu, kab vyśvietlić asoby padazravanych i ŭ dalejšym zatrymać ich. Ciapier ź imi pravodziacca śledčyja dziejańni.
Śledčy kamitet pa hetym fakcie raspačaŭ kryminalnuju spravu pa č. 1 art. 14 (zamach na złačynstva) i č. 2 art. 205 (kradziež) KK RB. Zatrymanym pahražaje pakarańnie papraŭčymi rabotami na termin da dvuch hadoŭ, abo aryštam na termin ad troch da šaści miesiacaŭ, abo abmiežavańniem voli na termin da čatyroch hadoŭ, abo pazbaŭleńniem voli na toj ža termin.
Heta nie pieršy vypadak ździajśnieńnia pravaparušeńnia ŭ dačynieńni da 98-hadovaha piensijaniera. Litaralna ŭ tym ža miesiacy machlarki padobnym čynam vykrali ŭ vieterana bajavyja ŭznaharody Vialikaj Ajčynnaj vajny. Praŭda, i tady złamyśnicam daloka syści nie ŭdałosia, jany byli zatrymanyja milicyjantami ciaham paŭhadziny.
