U Barsiełonie žyvie 1,6 miljona čałaviek. U minułym hodzie horad pryniaŭ 32 miljony turystaŭ. Zrazumieła, što turysty prynosiać Barsiełonie hihanckija hrošy, ale zadavolenyja imi daloka nie ŭsio: pryjezdžyja raździmajuć ceny na žyllo i ježu, praź ich pa Barsiełonie niemahčyma ni prajści, ni prajechać, uzrovień złačynnaści raście. Mer horada Ada Kołau vyrašyła viarnuć miascovym žycharam Barsiełonu i paśladoŭna ŭvodzić usio novyja miery dla taho, kab abmiežavać patok turystaŭ.
Josep Lago, AFP
Ada Kołau stała meram Barsiełony ŭ 2015 hodzie i adrazu ž damahłasia štrafu Airbnb i jaho kankurentu Homeaway za niapravilnuju rekłamu, a taksama ŭviała hadavy maratoryj na budaŭnictva novych haścinic u centry horada. Pad pahrozaj akazalisia 30 inviestycyjnych prajektaŭ, pryčym niekatoryja kampanii ŭžo vykupili płoščy pad haścinicy. U 2016-m maratoryj byŭ padoŭžany, a ŭ lutym 2017-ha Barsiełona i zusim abviaściła: budavać haścinicy ŭ centry zabaroniena, pryčym navat na miescy źbiadniełych.
Heta nie adzinaje abmiežavańnie — śpiecyjalny płan pa pryniaćci turystaŭ (Special Urban Plan for Tourist Accommodation, PEUAT) praduhledžvaje, što da 2019 hoda buduć uviedzieny novyja abmiežavańni. Jakimi jany buduć, možna mierkavać pa stratehičnym płanie pa turyźmie da 2020 hoda. Jak piša El Pais, ideja Kołau u tym, kab z dapamohaj ekanamičnych ryčahoŭ zrabić pajezdki ŭ Barsiełonu nie takimi pryvabnymi.
Tak, u Barsiełonie buduć rezka pavialičanyja padatki na nieruchomaść, jakaja zdajecca ŭ karotkaterminovuju arendu. Barsiełona taksama sprabuje damovicca z uradam Katałonii, kab horadu dazvolili kantralavać situacyju ŭ chostełach — naprykład, ukazvać maksimalnuju kolkaść pakojaŭ na paviersie.
U ramkach ekśpierymientu pavysiacca ceny na parkoŭku dla turystyčnych aŭtobusaŭ u papularnych miescach: naprykład, za prypynak la fantanaŭ na hary Manžuik pryjdziecca płacić nie 4,5 jeŭra, jak raniej, a 35. Vidavočna, što turystyčnyja kampanii buduć pierakładać hetyja vydatki na samich naviedvalnikaŭ Barsiełony.
Inšyja miery pa viartańni Barsiełony miascovym žycharam praduhledžvajuć abmiežavańnie na vykarystańnie siehviejaŭ i skuteraŭ u najbolš ažyŭlenych častkach horada. Niekatoryja vulicy stanuć piešachodnymi, a bary i restarany paprosiać prybrać stoliki sa šmatlikich płoščaŭ.
Jak adznačaje sajt Fact Co.Exist, płan Kołau mnohija krytykujuć: adnym nie padabajucca abmiežavańni, nakładzienyja joj na biznes (jak-nijak śfiera turyzmu — heta 14% usioj ekanomiki Barsiełony), inšyja ličać, što abmiažoŭvać patok pryjezdžych treba radykalna, na ich dumku, treba nie tolki zabaranić budaŭnictva novych hatelaŭ, ale i abmiežavać mahčymaści chostełaŭ i kampanij, jakija pradstaŭlajuć apartamienty.
