Arhanizacyja pa biaśpiecy i supracoŭnictvie ŭ Jeŭropie ličyć, što rašeńnie Rasii ab pryznańni dakumientaŭ t.zv. «DNR» i «ŁNR» «supiarečyć metam pracesu ŭrehulavańnia na ŭschodzie Ukrainy». Pra heta havorycca ŭ zajavie aŭstryjskaha staršynstva ABSIE, apublikavanym 20 lutaha na sajcie arhanizacyi, piša DW.
«Staršynstva ABSIE vykazvaje surjoznuju zaniepakojenaść z nahody hetaj miery, pryniataj u Rasijskaj Fiederacyi», — adznačajecca ŭ dakumiencie.
U ABSIE padkreślivajuć, što dakumienty, vydadzienyja na suvierennaj terytoryi Ukrainy, dziejničajuć tolki ŭ tym vypadku, kali jany vypuščanyja ŭładami, pryznanymi na mižnarodnym uzroŭni.
Arhanizacyja nastojvaje na tym, što ŭsie namahańni pa narmalizacyi stanovišča ludziej, jakija žyvuć u Danbasie, pavinny prykładacca «ŭ poŭnaj adpaviednaści z pryncypami i abaviazacielstvami ABSIE i minskich pahadnieńniaŭ». «Adnabakovyja dziejańni staviać pad pahrozu namahańni pa vyrašeńni kryzisu va Ukrainie i vakoł jaje», — skazana ŭ zajavie ABSIE.
Ukaz ab pryznańni na terytoryi Rasii dakumientaŭ, vydadzienych hramadzianam Ukrainy i asobam biez hramadzianstva na «terytoryjach asobnych rajonaŭ Danieckaj i Łuhanskaj abłaściej», rasijski prezident Uładzimir Pucin padpisaŭ 18 lutaha.
