Temu stvareńnia śpiecyjalnych vahonaŭ dla žančyn ciapier aktyŭna abmiarkoŭvajuć u Šanchai. Z padobnaj inicyjatyvaj vystupiŭ deputat miascovaha Schodu narodnych pradstaŭnikoŭ Šeń Ciuńchuej, arhumientujučy heta tym, što ŭ hadziny pik šmat kabiet adčuvajuć dyskamfort, i nie zaŭsiody mužčyny pavodziać jak džentlmieny. Svaju inicyjatyvu Šeń prapanavaŭ abmierkavać publična i zładzić ekśpierymient na niekalkich linijach mietro.
Niekalki hadoŭ tamu za padobnuju mieru vystupali i ŭ Rasii, kab zrabić mietrapaliten u vialikich haradach bolš kamfortnym dla ciažarnych žančyn, maleńkich dziaciej i pažyłych ludziej. Za hetymi katehoryjami hramadzian prapanavali zamacavać, naprykład, pieršy vahon. Ale ŭ Dziarždumie zakonaprajekt vyklikaŭ šmat pytańniaŭ kštałtu: «Chto budzie kantralavać patok pasažyraŭ, ci chopić u ich sumleńnia prytrymlivacca novych praviłaŭ?» i hetak dalej. Pytańni tak i zastalisia adkrytymi.
My spytali ŭ pres-sakratara Minskaha mietrapalitena Andreja Kuźmina, ci abmiarkoŭvałasia takoje kali-niebudź u dačynieńni da minskaha mietro.
«Asobnyja vahony, mnie zdajecca, aktualnyja dla tych krain, dzie ich vyrašajuć zrabić pa relihijnych pryčynach abo z-za nieraŭnapraŭja pałoŭ, čaho ŭ nas niama. U Minsku heta taksama było b niemahčyma z techničnaha punktu pohladu: u ciahnikoŭ usiaho piać vahonaŭ. Ale jany majuć śpiecyjalnyja miescy dla ciažarnych žančyn i dziadul z babulami. Kali im nie sastupajuć miesca, heta ŭžo prablema vychavańnia».
Darečy, admysłovyja vahony dla žančyn isnujuć u mnohich krainach: Japonii, Iranie, Ałžyry, Kairy, Brazilii i inš. U pieršuju čarhu jany stvorany, kab baranić ad seksualnych damahańniaŭ, i miascovyja ŭłady navat štrafujuć mužčyn, jakija sprabujuć zaskočyć u «žanočyja» vahony.
