Za apošnija try hady ŭ lasach Biełarusi było źniščana 100 tysiač dzikoŭ, paviedamiŭ 8 lutaha na pres-kanfierencyi ŭ Minsku ministr lasnoj haspadarki Michaił Amieljanovič, piša BiełaPAN.
Jon nahadaŭ, što rašeńnie ab źniščeńni dzikoŭ jak raznosčykaŭ afrykanskaj čumy śviniej było pryniataje ŭ 2013 hodzie, kali ŭ Hrodzienskaj i Viciebskaj abłaściach fiksavalisia ŭspyški AČS. Na siońnia, pavodle słoŭ ministra, u krainie naličvajecca 2,6 tysiačy asobinaŭ dzikoŭ.
Što tyčycca papulacyj inšych dzikich źviaroŭ u biełaruskich lasach, to jany pavialičvajucca, paviedamiŭ Amieljanovič. Heta, u pryvatnaści, tyčycca aleniaŭ, kazul i inšych žyvioł. «Kolkaść źviaroŭ raście, i idzie raźvićcio dziejnaści palaŭničych haspadarak. Jość dla hetaha płoščy. Ale pa mnohich vidach žyvioł (łasi, aleni, kazuli) my jašče nie dajšli da aptymalnaha značeńnia», — padkreśliŭ ministr.
Jon taksama zakranuŭ temu papulacyi vaŭkoŭ. Pry aptymalnaj kolkaści dla Biełarusi 500—600 asobin na ŭliku ŭ 2016 hodzie było 1.637 vaŭkoŭ, paviedamiŭ čynoŭnik.
Sioleta, pavodle jaho słoŭ, viadziecca padlik vaŭkoŭ u lasach, asabliva ŭ zakaźnikach, dzie ich žyvie vialikaja kolkaść. «Jość abaroncy vaŭkoŭ, ekołahi, navukoŭcy. Ale voŭk nanosić vialikija straty chatniaj žyviołahadoŭli. Treba zachoŭvać papulacyju, ale nie ŭ takoj kolkaści», — padkreśliŭ Amieljanovič.
Vaŭki, pavodle jaho słoŭ, źniščajuć žyvioł i ŭ zapaviednikach: adzin voŭk na praciahu hoda źjadaje 1,5 tony miasa.
«Dla taho kab zabiaśpiečyć žyćciadziejnaść hetaha drapiežnika, treba vialikaja kolkaść inšych žyvioł u lasach», — dadaŭ kiraŭnik Minlashasa.
