45 udzielnikaŭ hramadskich słuchańniaŭ, jakija praviała kampanija «Havary praŭdu» 7 lutaha ŭ Minsku, padpisali piersanalnyja zvaroty da Alaksandra Łukašenki z patrabavańniem pryznać, što dekret № 3 «Ab papiaredžańni sacyjalnaha ŭtrymanstva» straciŭ siłu.
U dakumiencie adznačajecca, što ŭ Biełarusi zališniaja pracoŭnaja siła składaje prykładna 700 tysiač čałaviek. «Niama dzie ludziam u Biełarusi pracavać, niama dzie! I Vam, jak kiraŭniku dziaržavy, treba było b radavacca, što hetyja hramadzianie nie biaruć šturmam urad z patrabavańniem dać im albo pracu, albo dapamohu pa biespracoŭi, pavialičanuju chacia b da 300 rubloŭ. Vam by radavacca, što jany abychodziacca biez padačak ad dziaržavy, zarablajuć. Chto ŭ Polščy, chto ŭ Rasii, chto jašče dzieści i niejak, a Vy złujeciesia na ich i padpisvajecie dekret № 3 «Ab papiaredžańni sacyjalnaha ŭtrymanstva», — havorycca ŭ zvarocie.
Udzielniki słuchańniaŭ padkreślivajuć, što dekret nie tolki parušaje Kanstytucyju, ale i pazbaŭleny «prostaha zdarovaha sensu». «Nie varta razdražniać svaich suhramadzian padobnymi inicyjatyvami ŭ situacyi sacyjalna-ekanamičnaha kryzisu, jaki nieviadoma kali budzie pieraadoleny. Admianicie dekret № 3, spadar prezident! Nie praz hod-dva, a ciapier. Pryznajcie, što jon straciŭ siłu. Ź mierkavańniaŭ hramadzianskaj zhody i papiaredžańnia sacyjalnaha napružańnia. Tak, aŭtary dekreta kažuć pra vydumanaje utrymanstva, a ja — pra spraviadlivaść i nieabchodnaść paźbiehnuć niepatrebnaha napružańnia ŭ hramadstvie», — havorycca ŭ piersanalnym zvarocie.
Taksama ŭdzielniki hramadskich słuchańniaŭ pryniali zvarot da Pałaty pradstaŭnikoŭ, u jakim prosiać deputataŭ nakiravać u Kanstytucyjny sud zapyt ab praviercy dekreta № 3 na pradmiet jaho adpaviednaści Kanstytucyi.
Akramia taho, udzielniki słuchańniaŭ źviarnulisia da strukturnych padraździaleńniaŭ hramadskich abjadnańniaŭ Biełarusi ŭ rehijonach, kab jany arhanizavali masavuju kampaniju indyvidualnych i kalektyŭnych zvarotaŭ u miascovyja orhany vykanaŭčaj ułady z patrabavańniami admieny dekreta № 3.
«Tolki sumiesnymi namahańniami — aktyŭnymi i masavymi — my zmožam adnavić spraviadlivaść i spynić pakarańnie dziaržavaj tych ludziej, jakija pa vinie dziaržaŭnaj sacyjalna-ekanamičnaj palityki zastalisia siońnia biez pracy i hodnaha zarobku», — havorycca ŭ zvarocie.
