Ahrasiadzibam Biełarusi dazvolać pravodzić viasielli i bankiety z vypłataj zboru, paviedamiŭ siońnia žurnalistam ministr sportu i turyzmu Alaksandr Šamko paśla pasiadžeńnia rabočaj hrupy dla vypracoŭki prapanoŭ pa ŭdaskanaleńni dziejnaści subjektaŭ ahraekaturyzmu.
belarus.by
«Prajekt ukaza pa ŭdaskanaleńni dziejnaści subjektaŭ ahraekaturyzmu ŭžo znachodzicca na stadyi zaviaršeńnia, siońnia abmiarkoŭvalisia apošnija źmianieńni. Na praciahu tydnia płanujecca ŭnieści dakumient u Saŭmin, spadziajusia, na praciahu miesiaca dakumient budzie padpisany. Hety ŭkaz vyklikaŭ peŭny rezanans siarod hramadskaści, ale ŭsie syšlisia na tym, što dakumient patrabuje źmianieńniaŭ», — padkreśliŭ ministr.
Zhodna z novym ukazam budzie pašyrany pieralik pasłuh, jakija mohuć akazvacca subjektami ahraekaturyzmu. U jaho płanujecca ŭklučyć takija punkty, jak praviadzieńnie prezientacyj, jubilejaŭ, bankietaŭ; akazańnie pasłuh łaźniaŭ, saŭny i dušavych; katańnie na žyviołach i hužavym transparcie; pradastaŭleńnie invientaru dla sportu i adpačynku. Pry hetym pry akazańni pasłuh pa praviadzieńni prezientacyj i bankietaŭ uładalniki ahraekasiadzib buduć vypłačvać zbor za kožny miesiac, u jakim akazvałasia pasłuha. Vieličynia hetaha zboru budzie zaležać ad miescaraźmiaščeńnia subjekta ahraekaturyzmu: płanujecca, što zbor budzie bolšym dla ahrasiadzib, raźmieščanych niedaloka ad Minska abo abłasnych centraŭ. [Nahadajem, raniej praviadzieńnie bankietaŭ i viasiellaŭ u ahrasiadzibach chacieli zusim zabaranić — NN]
Ministr taksama padkreśliŭ, što źmianieńni buduć datyčacca i vykanańnia subjektami ahraekaturyzmu sanitarna-epidemijałahičnych patrabavańniaŭ. «My pavinny stvaryć takija ŭmovy, kab i našy turysty, i turysty z-za miažy byli ŭpeŭnieny, što ich biaśpieka ŭ čas adpačynku budzie harantavana», — kanstatavaŭ jon.
Zahadčyca adździaleńnia hihijeny charčavańnia Respublikanskaha centra hihijeny, epidemijałohii i hramadskaha zdaroŭja Vija Šukievič rastłumačyła, što siońnia dla abjektaŭ ahraekaturyzmu isnujuć asobnyja sanitarnyja normy i praviły.
«Ale dla arhanizacyi takich masavych mierapryjemstvaŭ, jak viasielli, heta vielmi małyja patrabavańni. I jany nie zmohuć harantavać biaśpieku ŭ častcy zachavańnia sanitarna-epidemijałahičnaj stabilnaści nasielnictva. Mahčyma, buduć uniesieny źmianieńni va ŭžo isnujučyja sanitarnyja normy i praviły. Dakumient patrabuje dapracoŭki, nieabchodna ŭnieści niekatoryja pałažeńni, jakija zabiaśpiečać biaśpieku našamu nasielnictvu», — reziumavała jana i zajaviła, što pry hetym budzie ŭličvacca śpiecyfika raboty takich abjektaŭ.
U dakumiencie dakładna prapisana, što ciapier budzie ličycca ahraekasiadzibaj. Tak, u jaje buduć uvachodzić i haściavyja damy, raźmieščanyja na adnym ziamielnym učastku z žyłym domam haspadaroŭ, a taksama žyłyja i haściavyja damy na inšych učastkach, što raźmieščany ŭ adnym nasielenym punkcie albo prymykajuć terytaryjalna. Pry hetym ahulnaja kolkaść žyłych pakojaŭ u ahraekasiadzibie dla raźmiaščeńnia turystaŭ nie moža pierasiahać dziesiaci.
Havoračy ab časavych terminach pryniaćcia dakumienta, Alaksandr Šamko rastłumačyŭ, što ab pierachodnym pieryjadzie dla subjektaŭ ahraekaturyzmu ciapier razmovy nie idzie. Raniej havaryłasia pra dva hady pierachodnaha pieryjadu.
«U paraŭnańni ź pieršapačatkovymi prapanovami pa źmianieńni ŭkaza ciapier u dakumiencie bolš demakratyčnyja normy. I jany absalutna nie patrabujuć niejkaha pierachodnaha pieryjadu. Rabočaja hrupa pasprabavała ŭličyć intaresy ŭsich — i pradstaŭnikoŭ dziaržorhanaŭ, i ŭładalnikaŭ ahraekasiadzib. Hetymi źmianieńniami my nie naškodzim halinie, a tolki ŭparadkujem jaje rabotu», — padkreśliŭ ministr.
Namieśnik dyrektara departamienta pa turyźmie Ministerstva sportu i turyzmu Vital Hrycevič dadaŭ, što novy dakumient praduhledžvaje jašče niekalki važnych momantaŭ. Naprykład, zajmacca ahraekaturyzmam ciapier nielha budzie ŭ małych haradach rajonnaha padparadkavańnia z kolkaściu nasielnictva da 20 tys. čałaviek, taksama źnimajecca norma, jakaja dazvalaje zajmacca ahraekaturyzmam u kvatery ŭ žyłym domie. Treci momant - nielha zajmacca hetym vidam dziejnaści tym ludziam, jakija nie viaduć asabistuju padsobnuju haspadarku.
«Pry hetym buduć zrobleny vyklučeńni dla tych subjektaŭ ahraekaturyzmu, jakija pracujuć užo, — jany zmohuć pracavać na raniejšych umovach», — reziumavaŭ jon.
