Šaściora vučniaŭ minskaha liceja atrymali traŭmy ranicaj 23 studzienia, katajučysia z horki ŭ parku «Soniečnaja dalina» ŭ Kurasoŭščynie. Hetuju infarmacyju paćvierdzili ŭ Śledčym kamitecie.
«Vučni staličnaha liceja №5 transpartnaha budaŭnictva pajšli na ŭroku fizkultury razam z vykładčykam u park Kastryčnickaha rajona Minska «Soniečnaja dalina». Vykładčyk dazvoliŭ chłopcam prakacicca na starym matracy z horki. Vynik — niekalki čałaviek traŭmavanyja, adzin straciŭ prytomnaść», — paviedamili ŭčora čytačy TUT.BY.
— Učora ranicaj hrupa navučencaŭ liceja była na zaniatkach pa fizkultury. Zaniatki prachodzili kala parku «Soniečnaja dalina», — paćvierdziŭ pradstaŭnik Śledčaha kamiteta Alaksiej Klimovič. - Šaściora navučencaŭ uziali mat, jaki vykarystoŭvajecca na horkach jak adbojnik — dla praduchileńnia traŭmaŭ. Chłopcy padnialisia na horku i na hetym macie źjechali ŭniz. Padčas katańnia pieršakurśniki atrymali traŭmy roznaj stupieni ciažkaści.
U adnaho z paciarpiełych pierałom ščykałatki, u asnoŭnym ža chłopcy atrymali ŭdary. Niekatoryja liceisty dahetul zastajucca ŭ balnicy.
Niahledziačy na toje, što zdareńnie adbyłosia ranicaj, da daktaroŭ navučency źviarnulisia tolki ŭviečary.
Sankcyi pa artykule «niadbajnaść» praduhledžvajuć da piaci hadoŭ pazbaŭleńnia voli.