Pavodle apošnich źviestak, padatkovyja orhany nakiravali bolš za 440 tysiač paviedamleńniaŭ hramadzianam na vypłatu zboru na finansavańnie dziaržaŭnych vydatkaŭ. Ab hetym paviedamlajecca na sajcie MPZ.
Praŭda, kolkaść tych, chto paśpiašaŭsia raźličycca z kaznoj, nie takaja vialikaja. Tak zvany padatak na darmajedstva zapłacili 34,4 tysiačy atrymalnikaŭ «listy ščaścia». Atrymlivajecca, što kožny 12-y vyrašyŭ nie dakazvać svajo prava nie płacić padatak.
Usiaho biudžet atrymaŭ ad darmajedaŭ 10,2 miljona rubloŭ (abo krychu bolš za 5 miljonaŭ dalaraŭ). Adnak dadzienyja pa kolkaści płacielščykaŭ mohuć źmianicca: pa zakonie sioleta ŭnieści padatak treba nie paźniej za 20 lutaha.
— Pry atrymańni paviedamleńnia na vypłatu zboru hramadzianin maje prava padać u padatkovy orhan dakumienty i (abo) tłumačeńni, jakija śviedčać ab adsutnaści ŭ jaho abaviazku pa vypłacie zboru, — nahadvajuć ŭ MPZ. Tam taksama ŭdakładniajuć, što prainfarmavać padatkovy orhan pra svajo prava na vyzvaleńnie ad vypłaty zboru možna pry asabistym zvarocie ŭ inśpiekcyju albo šlacham nakiravańnia ŭ inśpiekcyju tłumačeńniaŭ i (abo) dakumientaŭ u elektronnym vyhladzie.
Ciapier płaciać padatak biełarusy, jakija nie pracavali bolš za 183 dzion u 2015 hodzie. Rassyłka paviedamleńniaŭ za hety pieryjad pavinna była skončycca 20 studzienia.
