Vystupajučy za dekret «ab darmajedach», deputaty Pałaty pradstaŭnikoŭ vykonvajuć volu čynoŭnikaŭ, a nie vybarščykaŭ, zajaviŭ staršynia Mahiloŭskaj abłasnoj arhanizacyi Abjadnanaj hramadzianskaj partyi Uładzimir Šancaŭ.
U listapadzie—śniežni 2016 hoda hramadskija aktyvisty sabrali ŭ Mahilovie bolš za 500 podpisaŭ pad patrabavańniem da deputataŭ Pałaty pradstaŭnikoŭ ad abłasnoha centra ab admienie dekreta ab «darmajedach». U kalektyŭnym adkazie deputaty Volha Pietrašova, Piotr Sałaŭjoŭ i Alaksandr Staravojtaŭ zajavili, što pryčyn dla admieny dekreta № 3 «Ab papiaredžańni sacyjalnaha ŭtrymanstva» ad 2 krasavika 2015 hoda niama.
Šancaŭ abvinavaciŭ deputataŭ ad Mahilova ŭ ihnaravańni mierkavańnia vybarščykaŭ. «Kali da ciabie źviartajucca vybarščyki z patrabavańniem admianić toje, što vielmi drennaje, niama čaho apielavać naohuł da čynoŭnikaŭ, jakija prosta supraćstajać nasielnictvu. Zbor podpisaŭ pakazaŭ, na čyim baku hetyja našy mahiloŭskija deputaty. Jany ŭsie nie na baku naroda, jaki ich vybraŭ, a na baku čynoŭnikaŭ», — skazaŭ pradstaŭnik AHP.
«Sałaŭjoŭ, Staravojtaŭ i Pietrašova napisali, što jość vaša mierkavańnie, ale jość i inšaje mierkavańnie. Ale mierkavańnie pavinna na niečym hruntavacca. Majo mierkavańnie hruntujecca na ćviarozym rozumie, na vyjaŭleńni najhrubiejšaha parušeńnia Kanstytucyi, na tym, što tak nielha sa svaim narodam rabić. A ŭ ich napisana, što ŭ respublicy pravodzicca sistemnaja praca pa stvareńni novych pracoŭnych miescaŭ. Ale ŭ vyniku hetaj pracy ŭ Biełarusi kolkaść zvolnienych na 100 tys. bolšaja za kolkaść pryniatych na pracu. Heta značyć 100 tys. čałaviek stracili pracu. Im čynoŭnik niešta padaŭ, jany ślepa pierapisali i ničoha nie pravieryli», — zajaviŭ apazicyjanier.
Pavodle jaho słoŭ, nieabchodna, kab tyja, chto hałasavaŭ za hety dekret, adčuvali siabie niaŭtulna i razumieli, što krynicaj ułady ŭ Biełarusi źjaŭlajecca narod. «Najbližejšym časam niechta z deputataŭ atrymaje 300 podpisaŭ z patrabavańniem dać spravazdaču, a dalej budziem hladzieć pavodle abstavin», — skazaŭ Šancaŭ, adznačyŭšy, što pracedura adklikańnia deputata vielmi składanaja, ale aktyvisty hatovyja jaje raspačać. Jon zaklikaŭ haradžan ustupać u inicyjatyŭnyja hrupy pa adklikańni deputataŭ Pałaty pradstaŭnikoŭ ad Mahilova.
