Rehistracyja na CT u Biełarusi pačniecca 2 maja, paviedamiŭ žurnalistam pieršy namieśnik ministra adukacyi Vadzim Bohuš.
«Terminy praviadzieńnia rehistracyi na CT zachavany tyja ž, jakija i byli, — heta z 2 maja pa 1 červienia. My płanujem, što ŭ cełym terminy ŭstupnaj kampanii nie buduć źmianiacca», — skazaŭ Vadzim Bohuš. Jon dadaŭ, što źmianieńniami ŭ praviły pryjomu va ŭstanovy vyšejšaj i siaredniaj śpiecyjalnaj adukacyi praduhledžvajecca mahčymaść arhanizacyi da troch reziervovych dzion CT dla tych, chto pa ŭvažlivych pryčynach nie zmoh zdać teściravańnie ŭ asnoŭnyja dni. Raniej byŭ tolki adzin reziervovy dzień dla praviadzieńnia CT.
Pavodle słoŭ pieršaha namieśnika ministra, novaŭviadzieńni ŭ praviły pryjomu naŭrad ci mocna paŭpłyvajuć na terminy praviadzieńnia ŭstupnaj kampanii ŭ cełym. Miechanizm ustupnaj kampanii zastajecca raniejšym. Zastajecca etap, źviazany z rehistracyjaj na CT, zdačaj adpaviednych ustupnych ispytaŭ, a taksama etap pryjomu dakumientaŭ u pryjomnyja kamisii navučalnych ustanoŭ, konkursnaha adboru i zaličeńnia.
Vadzim Bohuš nahadaŭ, što spačatku tradycyjna padvodziacca papiarednija vyniki ŭstupnaj kampanii ŭ vyšejšyja navučalnyja ŭstanovy, zatym — u siarednija śpiecyjalnyja i prafiesijna-techničnyja ŭstanovy adukacyi. Takim čynam, usio leta pryśviečana davoli aktyŭnaj rabocie pa adbory abituryjentaŭ dla navučańnia va ŭstanovach adukacyi.
