U chodzie daśledavańniaŭ, praviedzienych va ŭniviersitecie Limieryka ŭ Irłandyi, častka stravavalnaj sistemy čałavieka atrymała novuju kłasifikacyju i ciapier nazyvajecca orhanam, piša VVS.
Tut i nižej vyjavy: The Lancet Gastroenterology & Hepatology
Raniej ličyłasia, što bryžejka, jakaja złučaje straŭnik z kišečnikam, składajecca z mnostva asobnych častak.
Adnak, jak vyśvietliŭ irłandski chirurh prafiesar Dž. Kiełvin Kofi, na samaj spravie heta sucelny orhan.
Pa słovach prafiesara Kofi, vyniki jaho daśledavańnia, apublikavanyja ŭ časopisie Lancet, mohuć adkryć novuju eru ŭ navucy i spryjać razumieńniu šerahu zachvorvańniaŭ.
Adnak ciapier patrabujucca dadatkovyja daśledavańni, kab vyśvietlić dakładnuju funkcyju «novaha orhana».
«My ŭžo vyśvietlili anatomiju i strukturu bryžejki, ciapier čarha za funkcyjaj, — kaža prafiesar Kofi. — Kali zrazumieć funkcyju orhana, možna vyśvietlić i parušeńnie hetaj funkcyi — i takim čynam vyznačyć zachvorvańnie. A ŭsio razam heta daje novaje pole dla navukovaha daśledavańnia bryžejki».
Kofi upeŭnieny, što bryžejka zasłuhoŭvaje takoha ž uvažlivaha vyvučeńnia, jak i ŭsie astatnija orhany čałaviečaha arhanizma.
Nie vyklučana, što hety orhan hraje važnuju rolu ŭ takich zachvorvańniach, jak rak kišečnika, zapaleńnie kišečnika, dyjabiet i atłuścieńnie.
Bryžejka ŭjaŭlaje ź siabie składzienuju ŭdvaja brušynu, jakaja vyściłaje brušnuju paražninu. Jana prymacoŭvaje da zadniaj ścienki žyvata straŭnik, tonkuju kišku, toŭstuju kišku i inšyja połyja orhany.
