Padčas transparciroŭki pa čyhuncy na adnoj sa stancyj achoŭny mietaličny transpartny kažuch korpusa reaktara začapiŭ aporu kantaktnaj sietki.
Pieršy korpus reaktara padčas transpartavańnia pa Biełarusi. Fota BiełaPAN.
U aficyjnym paviedamleńni na sajcie BiełAES havorycca:
«26 śniežnia 2016 hoda padčas vykanańnia manieŭrovych apieracyj na stancyi Słaŭnaje Biełaruskaj čyhunki ŭ niehabarytnym miescy adbyŭsia niaznačny dotyk achoŭnaha mietaličnaha transpartnaha kažucha zvyšhabarytnaha hruzu (korpusa reaktara dla Biełaruskaj AES) ab aporu kantaktnaj sietki. Paškodžańniaŭ na korpusie reaktara nie vyjaŭlena. Parušeńnia hrafika ruchu ciahnikoŭ nie było. Hruz nakiroŭvajecca dalej pa ŭstanoŭlenym raskładzie».
Jak infarmuje BiełTA sa spasyłkaj na pres-słužbu Respublikanskaha ŭnitarnaha pradpryjemstva «Biełaruskaja atamnaja elektrastancyja», dbajnuju ekśpiertyzu, «u adpaviednaści ź dziejnymi normami i praviłami», praviaduć pa prybyćci korpusa na placoŭku budaŭnictva stancyi ŭ Astravieckim rajonie.
Paviedamlajecca, što transparciroŭka novaha korpusa reaktara z Rasii adbyvajecca pa čyhuncy ŭ supravadžeńni pradstaŭnika zavoda-vytvorcy «AEM-technałohii».
Biełaruski bok zapatrabavaŭ u rasijskaha boku zamianić pieršy korpus reaktara paśla zdareńnia, jakoje adbyłosia na budaŭničaj placoŭcy AES u lipieni. Šmattonnaja mietaličnaja kanstrukcyja «saśliznuła na hrunt» z vyšyni niekalkich mietraŭ. Taksama śćviardžałasia, što paškodžańniaŭ na korpusie niama, ale biełaruski bok vykazaŭ žadańnie jaho zamianić na novy.
