Pieramovy Biełarusi ź Mižnarodnym valutnym fondam iduć kanstruktyŭna, zastalisia dźvie składanyja hrupy pytańniaŭ — ab źmienie taryfaŭ ŽKH i ab udaskanaleńni pracy dziaržsiektara ekanomiki.
Pra heta paviedamiŭ premjer-ministr Biełarusi Andrej Kabiakoŭ u intervju infarmahienctvu Reuters, vytrymki ź jakoha publikuje 20 śniežnia sajt Savieta ministraŭ.
«Supiarečnaściaŭ u častcy kanceptualnych padychodaŭ niama. Havorka idzie bolš pra terminy. My — za bolš płaŭnuju dynamiku źmieny, a partniory — za bolš krutuju dynamiku źmienaŭ. My ličym, što ŭžo viasnoj-letam my budziem hatovyja prapanavać dalejšyja miery hetaha ŭdaskanaleńnia», — skazaŭ premjer.
«My chočam ledź pavolniej, ale, pažadana, biez surjoznych pamyłak. Ekanomika respubliki źviedała surjozny šok u kancy 2014-ha, 2015 hodzie i pačatku 2016 hoda. Užyvajučy sankcyi da Rasii (majucca na ŭvazie sankcyi Zachadu), ich faktyčna ŭžyli i da Biełarusi. Na hetym fonie adbyłosia padzieńnie koštaŭ na naftu, i, jak śledstva, biełaruskaja ekanomika adčuła šok», — adznačyŭ Kabiakoŭ.
Pavodle jaho słoŭ, biełaruski bok raźličvaje, što ŭ nastupnym hodzie rabota pa hetych dźviuch temach z MVF budzie zavieršanaja.
«U pryncypie, my imkniemsia da taho, kab pačać prahramu ŭ pieršaj pałovie 2017 hoda. Ale nie luboj canoj — my chočam rabić pieraŭtvareńni, jakija nieabchodna rabić, jakija my bačym i pa jakich my zhodnyja z MVF. Ale jany pavinny adbyvacca z adekvatnaj chutkaściu, bieź ciažkich sacyjalna-ekanamičnych nastupstvaŭ dla hramadzian», — padkreśliŭ premjer-ministr.
Prahrama supracoŭnictva z MVF «sama pa sabie, jaje charaktar taki, što jana bolš upłyvaje na ŭpeŭnienaść, čym na kankretnaje finansavańnie jakich-niebudź prablemnych pytańniaŭ», adznačyŭ Kabiakoŭ. «Sutnaść prahramy — dać 3,5 miljarda dalaraŭ, jakija my mahli b pakłaści ŭ zołatavalutnyja reziervy i ich nie čapać. Najaŭnaść hetych hrošaj dazvoliła b biełaruskamu ŭradu adčuvać sabie bolš upeŭniena», — skazaŭ kiraŭnik urada. «Ale kali ich nie budzie, krytyčna śmiarotnaha tut ničoha niama», — dadaŭ jon.
