Apošnim časam u papularnaj aŭtarki vyjšła niekalki novych knih — druhi tom histaryčnych zamalovak «Rycary i damy Biełarusi», a taksama ruskamoŭnaje vydańnie pieršaj knihi sa znakamitaj sieryi «Avanciury Pranciša Vyrviča, škalara i špieha».
Ludmiła Rubleŭskaja - pracavitaja piśmieńnica, jakaja za apošnija 20 hadoŭ napisała šmat paetyčnych zbornikaŭ, ramanaŭ i apovieściaŭ. Biełaruskija školniki viedajuć jaje pa tvorach «Serca marmurovaha anioła» i pa sieryi knih pra pryhody Pranciša Vyrviča jakija ŭklučany ŭ školnuju prahramu. Na siońniašni dzień śviet užo ŭbačyŭ čatyry častki pryhod Pranciša na biełaruskaj movie.
Druhaja kniha narysaŭ «Rycary I damy Biełarusi» pryśviečana jak słavutym, tak i mienš viadomym piersanažam biełaruskaj historyi. Vy daviedajeciesia, jak sudzili polskuju karalevu Sofju Halšanskuju, jak Jan Sapieha palavaŭ na viedźmaŭ, jak Simiaon Połacki pisaŭ vizualnyja vieršy, jak biełaruski šlachcic Uładzisłaŭ Małachoŭski vynajšaŭ fotaaparat «Kodak», a kantrabandyst i špijon Siarhiej Piasiecki, siedziačy ŭ turmie, staŭ pieramožcam litaraturnaha konkursu.
U historyka-pryhodnickim bestselery «Avanciury Pranciša Vyrviča» apisvajucca nievierahodnyja padziei, hałoŭnymi hierojami jakich stali biehły studyjozus Mienskaha jezuickaha kalehiuma Pranciš Vyrvič i doktar Bałtramiej Lodnik z Połacku. Pryhody biełaruskich avanturystaŭ nie mienš cikavyja, čym pryhody francuzskich muškiecioraŭ abo ruskich hardemarynaŭ.
Piśmieńnica taksama padzielicca novymi płanami, a mienavita jakaja kniha zusim chutka, praź miesiac, źjavicca na knižnych palicach, a taksama pryadkryje tajamnicu, nad jakim tvoram jana pracuje ciapier. I, zrazumieła, adbudziecca aŭtohraf-siesija piśmieńnicy.
Darečy, padtrymać vydańnie novaj knihi Ludmiły Rubleŭskaj možna ŭžo zaraz — idzie narodny zbor srodkaŭ na płatformie Tałaka.
