Minharvykankam pryniaŭ rašeńnie ab spraščeńni pracedury ŭstanoŭki šłahbaumaŭ na ŭjezdach u dvary, paviedamiła 14 śniežnia na pres-kanfierencyi namieśnik hienieralnaha dyrektara HA «Minskaja haradskaja žyllovaja haspadarka» Halina Hilevič.
Pry hetym jana adznačyła, što dvarovyja terytoryi nie praduhledžvajuć pastajannaj parkoŭki aŭtamabilaŭ. «Raniej my stavili mašyny ŭ haražy, na stajanki, jeździli na hramadskim transparcie. Zaraz my chočam stavić svaje mašyny ŭ dvarach, i niechta pavinien zabiaśpiečvać zachavanaść našaj majomaści, — skazała Hilevič. — Ja liču, što pryniaćcie hetaha rašeńnia dazvolić navieści paradak na dvarovych terytoryjach, abmiežavać ŭjezd inšym, akramia žycharoŭ, haściej, śpiecyjalnych słužbaŭ. My pavinny hetym rašeńniem padšturchnuć nasielnictva na dobraŭparadkavańnie dvaroŭ».
Dla ŭstanoŭki šłahbauma nieabchodna pravieści schod žycharoŭ. Kali stanoŭčaje rašeńnie prymuć 50% plus adzin hołas udzielnikaŭ schodu, inicyjatyŭnaja hrupa padaje zajavu ŭ administracyju rajona. Zamoŭcam rabot moža vystupić tavarystva ŭłaśnikaŭ, arhanizacyja zabudoŭščykaŭ abo ŭpaŭnavažanaja asoba słužby zamoŭcy, jakaja ekspłuatuje damy. Paśla schodu treba sabrać podpisy žycharoŭ. jakija pahadzilisia z rašeńniem, aformić daviedku ab kolkaści žycharoŭ u domie, prapracavać pytańnie ab miescy ŭstanoŭki. Zatym žychary vybirajuć pastaŭščyka pryłady.
«Treba adznačyć, što žychary damoŭ sa skraznymi prajezdami ŭ inšyja dvary ŭstaloŭvać pryłady dla zamykańnia nie majuć prava», — paviedamiła Hilevič. Pavodle jaje słoŭ, pakul tolki 30 dvaroŭ u Minsku, jakija absłuhoŭvajucca kamunalnymi pradpryjemstvami, majuć šłahbaumy. Kolkaść dvaroŭ la damoŭ tavarystvaŭ ułaśnikaŭ sa šłahbaumam jana nie zmahła nazvać.
Namieśnik hiendyrektara adznačyła, što košt šłahbauma zaležyć ad jaho kanstrukcyi i funkcyj i składaje pryblizna 2.000 rubloŭ. Na pytańnie, jakim čynam buduć prapuskacca mašyny, u tym liku śpiecyjalizavanych słužbaŭ, jana adkazała: «Umova ŭstanoŭki — bieśpieraškodny prajezd śpiecsłužbaŭ, žycharoŭ i ich haściej. Siońnia jość niekalki sposabaŭ: z dapamohaj kanśjerža, sistemy videanazirańnia, uniasieńnie numaroŭ mašyn u pamiać kampjutara, davańnie kodaŭ dla prajezdu mašyn ekstrannych słužbaŭ. Usie jany zaležać ad vybaru žycharoŭ i ich finansavych mahčymaściaŭ».
Jak paviedamiŭ namieśnik dyrektara KUP «Minski haradski centr inžynirynhavych pasłuh» Dzianis Varaksa, pierad pačatkam prajektnych rabot dla ŭstanoŭki šłahbauma inicyjatyŭnaja hrupa moža źviarnucca ŭ ich centr dla atrymańnia zajaŭki-schiemy ab raźmiaščeńni inžyniernych sietak i techničnych umoŭ. «Heta nieabchodna, kab pry prajektavańni pryładu nie ŭstalavali na inžyniernych sietkach. Taksama vyznačajecca punkt siłkavańnia. Prajekt taksama ŭzhadniajecca, kab enierhietyki dali dazvoł, kab u dalejšym šłahbaum nie pieraškadžaŭ u vypadku nieabchodnaści pravodzić ramontnyja raboty», — rastłumačyŭ śpiecyjalist. Pavodle jaho słoŭ, uzhadnieńni zajmajuć 2—2,5 tydnia i kaštujuć pryblizna 1.000 rubloŭ.
Jak adznačyła načalnik upraŭleńnia haradskoj haspadarki i enierhietyki Minharvykankama — načalnik adździeła haradskoj haspadarki Maryna Małajeva, haradskija ŭłady čakajuć «usplosku ŭstanoŭki šłahbaumaŭ viasnoj nastupnaha hoda». «Heta nie robicca chutka, treba stvaryć inicyjatyŭnuju hrupu, pravieści schod, sabrać dakumienty, atrymać dazvoł administracyi, vybrać pryładu i hetak dalej. Dumaju, što viasnoj my ŭbačym vielmi šmat šłahbaumaŭ u dvarach», — skazała jana.
