U Minsku pradstaŭniki HZC «Galleria Minsk» pakazali žurnalistam, jak vyhladaje novy handlovy centr na Niamizie. Kramy raspačnuć pracu ŭžo 10 śniežnia, a aficyjnaje adkryćcio zapłanavanaje na 17 śniežnia.
Inviestycyi ŭ novy minski handlovy centr skłali kala 150 młn dalaraŭ. Kala 30% byli ŭkładzienyja inviestarami, astatnija ž 70% uziaŭ na siabie «BPS-Śbierbank». Kompleks maje płošču 54,5 tysiač kv.m., uklučaje 8 pavierchaŭ, hatel «DoubleTree by Hilton» i šmatuzroŭnievy parkinh.
Stvaralniki «Galleria Minsk» staviać pierad saboj metu pieraciahnuć amataraŭ jeździć na zakupy ŭ Polšu i Litvu. Dla hetaha, u tym liku, budzie adkrytaja pieršaja polskaja krama moładzievaha adzieńnia «Reserved». Jaje adkryćcio płanujecca na viasnu 2017 hoda.
Raspracoŭščykam łahatypa staŭ biełaruski mastak Uładzimir Ceśler. Interjeram zajmalisia anhličanie z dyzajn-studyi Alexander James.
Usiaho dla naviedvalnikaŭ buduć adkrytyja 8 pavierchaŭ. Na -1 paviersie budzie znachodzicca «Jeŭraopt» kłasa Super. Raspracoŭščyki patłumačyli, što heta budzie zusim novaja pa kancepcyi krama: majučy kłas luks, jana budzie dastupnaja dla ŭsich kašalkoŭ, u joj padkarektavanaja sistema raźliku na kasach i h.d.
Ź pieršaha pa piaty pavierch, akramia druhoha (tam znachodzicca parkinh), buduć kramy z kaśmietykaj, fešn-halerejami, dziciačym adzieńniem, spartyŭnymi tavarami i technikaj.
Adkryjecca i «Cropp» — jašče adzin papularny siarod biełaruskaj moładzi polski brend. Taksama siarod viadomych brendaŭ adzieńnia buduć LC Waikiki, Sister's, «Tvajo», Vince Moda, Rylko, Mothercare i h.d.
Na šostym paviersie budzie fud-kort. Pakul jon pradstaŭleny tryma kafe — «Mama Doma», «Salateira» i biełaruskim anałaham «Subway» — «SUB'S». U bližejšy čas śpis kafe pavinien papoŭnicca.
Julija Kurjan-Kaściukievič — adna z uładalnic sietak kafe «Mama Doma».
Na siomym paviersie raźmiaščajecca terasa, jakaja budzie adkrytaja ŭžo viasnoj.
«Galleria Minsk» niekalki razoŭ pieranosiła svajo adkryćcio. Ale navat siońnia daloka nie ŭsie miescy ŭ handlovym centry zaniatyja. Pa słovach inviestaraŭ, heta časovaja źjava, i ŭ chutkim časie kolkaść arendataraŭ pašyrycca. Pry hetym handlovy centr ličyć, što ceny ŭ kramach buduć dastupnyja dla 95% biełarusaŭ.
