Uzdoŭž piešachodnaj darožki, jakaja złučaje vulicu Jakubava i DK «Łošycki», viaducca padrychtoŭčyja raboty pa budaŭnictvie rovarnaj trasy, jakaja abydziecca biudžetu bolš čym u miljon dalaraŭ. Pra heta paviedamlaje ahienctva «Minsk-Naviny».
Načalnik upraŭleńnia architektury i budaŭnictva administracyi Leninskaha rajona Anastasija Asipovič raspaviała, što, zhodna z prajektam, trasa funkcyjanalna padzielenaja na dva ŭčastki. Pačali budavać pieršy, tranzitny. Jon złučyć Sierabranku z vuł. Majakoŭskaha pa karotkim šlachu. Praciahłaść vieładarožki z asfaltabietonu składzie 1,2 km, šyrynia pry dvuchbakovym ruchu — 3 m, ahulnaja płošča — 2960 kv. m. Da jaje budzie prymykać piešachodnaja zona ŭ vyhladzie tratuaraŭ i placovak z drobnaštučnaj plitki płoščaj 2310 kv. m.
Pobač ź isnujučym mostam pabudujuć žalezabietonny belečny most na palevych aporach daŭžynioj 24,8 m i šyrynioj 4,5 m (3 m + 1,5 m dla vieła— i piešachodnaha ruchu adpaviedna) ź mietaličnaj aharodžaj vyšynioj 1,3 m. Pa zaviaršeńni jaho budaŭnictva staroje zbudavańnie demantujuć.
Praduhledžvajecca aśviatleńnie ŭčastka i ŭstanoŭka małych architekturnych formaŭ (MAF), infarmacyjnych i papieradžalnych pakazalnikaŭ, a taksama mierapryjemstvy pa azielanieńni.
Realizacyja pieršaj čarhi prajekta, u tym liku ŭźviadzieńnie mosta, aceńvajecca ŭ 2 202 000 rubloŭ (kala 1,1 młn dalaraŭ). Na 2016 hod vydzielena 50 000 rubloŭ, jakija płanujecca asvoić na padrychtoŭčym etapie. Narmatyŭny termin budaŭnictva — 5 miesiacaŭ. Da rabot prystupili ŭ kancy kastryčnika.
Jak paviedamiŭ prarab hienpadradnaj arhanizacyi HP «SSK № 4 UDMBiD Minharvykankama» Dźmitryj Puryn, praviedzienyja arhanizacyjnyja mierapryjemstvy, u tym liku ŭźviadzieńnie budaŭničaha haradka. Rabočyja padvoziać ziamlu dla vyraŭnoŭvańnia budaŭničaj placoŭki, zrazajuć raślinny hrunt, vysiakajuć drevy i chmyźniaki. Na abjekcie pracujuć kala 10 čałaviek, zadziejničanyja 4 adzinki techniki.
Zamoŭcam vystupaje KUP «UKB Leninskaha rajona h. Minska». Načalnik budaŭničaha ŭpraŭleńnia №4 Alaksandr Suzin adznačyŭ, što šerah praduhledžanych prajektam rabot možna vykonvać tolki pry peŭnaj tempieratury vonkavaha pavietra, tamu tempy budaŭnictva zaležać i ad nadvorja. Pakul zastajecca adkrytym pytańnie, ci buduć zakryvać hety ŭčastak dla piešachodaŭ: darožku demantujuć, pierasoŭvacca ŭzdoŭž budplacoŭki stanie nie tolki niazručna, ale i niebiaśpiečna.
Druhaja čarha prajekta — pierśpiektyŭnaja. Jana praduhledžvaje budaŭnictva špacyrnaha ŭčastka daŭžynioj 2 km ad vieładarožki ŭ rajonie vulic Šepičy i Jakubava i dalej uzdoŭž raki Śvisłač z prypynkami na placoŭkach adpačynku, abstalavanych MAF. Pracy aceńvajucca ŭ 2 690 000 rubloŭ.
Uzdoŭž vuł. Jakubava ŭžo niekalki hadoŭ jak prakładzienaja vieładarožka, a ŭ Łošyckim parku, uvachod jakoha raźmiaščajecca nasuprać adnajmiennaha Pałaca kultury, arhanizavany prakat rovaraŭ, majecca nievialikaja maršrutnaja sietka. Hetyja dva abjekta źviaža novaja trasa.
