U rasijskaj stalicy palicyjanty zatrymali jurysta Ihara Trunova i francuzskaha kampazitara, lidara hurtu Space Dzidźje Maruani, jakija pryjechali ŭ «Śbierbank» padpisvać miravoje pahadnieńnie z rasijskim śpievakom Filipam Kirkoravym, pišanewsru.com.
kp.by
Pra heta paviedamiła advakatka Ludmiła Ajvar. Pavodle jaje viersii, Kirkoraŭ, abvinavačany francuzam u płahijacie, pahadziŭsia zapłacić kampiensacyju, a sam napisaŭ zajavu ab vymahalnictvie.
«U nas jość pierapiska z Kirkoravym, dzie jon abiacaje vypłacić kampiensacyju, — raspaviała advakatka. — Trunoŭ i Maruani pajechali ŭ «Śbierbank» na Pakroŭcy sustrakacca z Kirkoravym dla padpisańnia pahadnieńnia, ale tam ich čakała palicyja i advakat Kirkorava Alaksandr Dabravinski».
Raniej lidar hrupy Space Dzidźje Maruani praz svajho rasijskaha pradstaŭnika zajaviŭ, što vyjaviŭ płahijat u pieśni Kirkorava «Žiestokaja lubov». Muzyka śćviardžaje, što kampazicyja źjaŭlajecca płahijatam na jaho tvor A Symphonic Space Dream. Maruani padaŭ pazoŭ u Maskoŭski haradski sud, u jakim prosić zabaranić Kirkoravu vykonvać adzin ź jaho chitoŭ, a taksama spahnać z rasijskaha śpievaka, jaho kampazitara Aleha Papkova, telekanała «Rasija», hukazapisvalnaj kampanii Sony i TAA «Filip Kirkoraŭ pradakšn» pa piać miljonaŭ rasijskich rubloŭ za parušeńnie aŭtarskich pravoŭ i 50 miljonaŭ za maralnuju škodu. Ahulnyja patrabavańni skłali 75 miljonaŭ 340 tysiač rubloŭ.