U nacyjanalnym parku «Biełaviežskaja pušča» startavaŭ maštabny prajekt pa paŭtornym zabałočvańni asušanaha bałota Dziki Nikor, paviedamiła pres-słužba hramadskaj arhanizacyi «Achova ptušak Baćkaŭščyny» (APB).
Pavodle infarmacyi APB, bałota Dziki Nikor u centralnaj častcy Biełaviežskaj puščy ŭ 60-ja hady minułaha stahodździa było asušana. Siońnia, praz 50 hadoŭ, ekasistemu adnoviać u ramkach pryrodaachoŭnaha prajekta dla Biełaviežskaj puščy, jaki realizuje nacyjanalny park, APB i niamiecki partnior — Frankfurckaje zaałahičnaje tavarystva (FZT).
Ahulnaja płošča asušanaha bałota — bolš za 7 tys. ha. Dla paŭtornaha zabałočvańnia vybrany ŭčastak płoščaj 1,163 ha ŭ Pružanskim rajonie (hetu terytoryju ŭ 2004 hodzie dałučyli da Nacparka).
«Pieršapačatkova 30% usioj terytoryi Biełaviežskaj puščy zajmali bałoty. Ale pałova ź ich — 20 tys. hiektaraŭ — była mielijaravanaja i asušanaja ŭ 50—60-ja hady, z-za čaho ciapier my adznačajem dehradacyju ekasistem. Hidrałohija parušanaja surjozna, — prakamientavaŭ situacyju hiendyrektar nacparka «Biełaviežskaja pušča» Alaksandr Bury. — Kab spynić hetyja pracesy, my budziem paśladoŭna pracavać nad paŭtornym zabałočvańniem i adnaŭleńniem inšych ekasistem».
Namieśnik ministra pryrodnych resursaŭ i achovy navakolnaha asiarodździa Ihar Kačanoŭski, jaki taksama pabyvaŭ na Dzikim Nikory, adznačyŭ važnaść uźniaćcia pytańniaŭ ab adnaŭleńni hidrałahičnaha režymu na samym vysokim uzroŭni.
«U śniežni 2015 hoda pastanovaj Saŭmina była pryniataja stratehija zachavańnia i racyjanalnaha vykarystańnia tarfianikaŭ — dakumient, jaki dapamoža nam pracavać u hetym kirunku. Taksama vopyt Dzikaha Nikora važna raspaŭsiudzić i na inšyja terytoryi», — skazaŭ jon.
Pavodle słoŭ ekśpiertaŭ, terytoryja Dzikaha Nikora vybrana nievypadkova — asušanaje bałota znachodzicca ŭ centralnaj častcy Biełaviežskaj puščy i akazvaje ŭpłyŭ na vialikija płoščy. Adnaŭleńnie hetaha abjekta budzie mieć važnaje značeńnie i ŭ transhraničnym kantekście — paŭtornaje zabałočvańnie stanoŭča adabjecca i na lasach polskaj častki Biełaviežskaj puščy.
Taksama za košt skaračeńnia vykidaŭ parnikovych hazaŭ hetaja terytoryja dapamoža supraćstajać hłabalnamu paciapleńniu.
Zaraz u ramkach prajekta vydzielena try asnoŭnyja napramki rabot pa adnaŭleńni hidrałahičnaha režymu, paviedamiŭ dyrektar APB Alaksandr Vinčeŭski. Pieršy — asušanyja bałoty (takija, jak Dziki Nikor), druhi — naturalnyja bałoty, parušanyja mielijaracyjaj vakoł (bałota Dzikaje) i treci — vadacioki ŭnutry lesu, tak zvanaja lasnaja mielijaracyja.
Śpiecyjalisty adznačajuć, što paŭtornaje zabałočvańnie — doŭhi i składany praces. Kab ekasistema adnaviłasia całkam, treba 30—35 hadoŭ.
