Uviečary 26 listapada na trasie, jakaja idzie praź viosku Darava ŭ Lachavickim rajonie, vykanaŭca abaviazkaŭ načalnika baranavickaj DAI naśmierć źbiŭ piešachoda.
Andrej Vaŭkavycki.
DTZ adbyłosia kala 20:30. Pavodle infarmacyi ź nieaficyjnych krynic, u toj momant inśpiektary DAI spynili aŭtamabil, jakim kiravaŭ kiroŭca-biaspraŭnik. Pakul afarmlali pratakoł, 36-hadovaja žančyna-pasažyr, žycharka Słucka, vyjšła z mašyny, kab daviedacca pra pryčyny spynieńnia. Kali jana pierachodziła darohu, jaje źbiŭ aŭtamabil. Pavodle adnych źviestak, najezd byŭ ździejśnieny na piešachodnym pierachodzie, pa inšych — kala jaho. Žančyna zahinuła.
Pavodle infarmacyi TUT.BY, za styrnom aŭtamabila, jaki źbiŭ žančynu, znachodziŭsia vykanaŭca abaviazkaŭ načalnika ADAI Baranavickaha HAUS Andrej Vaŭkavycki. Mužčyna byŭ nie pry vykanańni, na asabistym aŭtamabili i ŭ cyvilnym adzieńni. Jon akazaŭsia mocna pjany: praviedzieny ahlad pakazaŭ, što ŭ jaho kryvi ŭtrymlivajecca amal 3 pramile ałkaholu.
Śledčy kamitet pačaŭ kryminalnuju spravu, kiroŭca ŭziaty pad vartu — jon u SIZA. Kali vina pjanaha kiroŭcy ŭ hibieli žančyny paćvierdzicca, jamu pahražaje da 7 hadoŭ pazbaŭleńnia voli.
Znajomyja zahinułaj paviedamili TUT.BY, što ŭ žančyny zastałosia dvoje niepaŭnaletnich dziaciej: synu 6 hadoŭ, dačce — šasnaccać.
