Vydaviectva «Halijafy» ładzić aŭtohraf-siesiju z nahody vychadu novaj knihi Kiryła Stasielki «Marginalis». Padčas mierapryjemstva možna budzie zadać pytańni aŭtaru, nabyć jak raman «Marginalis», tak i «Dziciačy manifiest» — papiaredniuju knihu piśmieńnika.
Marginalis — nasyčany i zachaplalny fiłasofski raman, dziejańni jakoha achoplivajuć bolš za čatyrysta hadoŭ, paŭtary sotni piersanažaŭ i dziasiatka krainaŭ, pazł z mnostva siužetnych linij i fiłasofskich dy psichałahičnych matyvaŭ, jakija składajucca ŭ adno cełaje. Dziejańni ramana razhortvajucca vakoł uładalnikaŭ staražytnaj zahadkavaj knihi. U pošukach siabie i svajho «ja» hieroi ramana prychodziać da razumieńnia, što časam nie mienšaje značeńnie maje toje, što znachodzicca na palach, pa-za centram, pa-za miežami. Pa-za miežami historyi, žyćcia, uvahi.
Raman «Marginalis» byŭ pryznany samym nasyčanym tvoram biełaruskaj litaratury. Rekord byŭ zafiksavany prajektam «Rekordy Kufara».
Dziciačy manifiest — sproba aŭtara znajści miežy i mahčymaści čałaviečaj svabody ŭ hramadstvie, zrazumieć asablivaści Rubikonu, jaki palahaje miž normaj i varjactvam. U knizie vy sustreniecie francuzskaha piśmieńnika, cieła jakoha znutry razryvajecca ad cisku ŭłasnaha Eha, čałavieka, čyja realnaść i son źlivajucca, mastaka, čyja hałava adździaliłasia ad cieła, dy šmat inšych hierojaŭ, jakija pa-roznamu namahajucca napisać manifiest svajho «Ja».
Zbornik «Dziciačy manifiest» byŭ naminavany na čatyry litaraturnyja premii, u pryvatnaści, trapiŭ u šort-list premii «Debiut» dy łonh-list premii Hiedrojca.
Kirył Stasielka
naradziŭsia ŭ Barysavie. U 2013 skončyŭ fakultet fiłasofii i sacyjalnych navuk BDU pa śpiecyjalnaści «Sacyjałohija», u 2014 — mahistraturu Instytuta padrychtoŭki navukovych kadraŭ pry NAN RB. Źjaŭlajecca vypusknikom Biełaruskaha kalehiuma, Latučaha ŭniviersiteta, Škoły maładoha piśmieńnika pry HA «Sajuz biełaruskich piśmiennikaŭ» i Škoły maładych mieniedžaraŭ publičnaha administravańnia (Biełaruś, Šviecyja).
Na dadzieny momant navučajecca ŭ aśpirantury Akademii navuk, źjaŭlajecca dyrektaram «Ahienctva infarmacyjnych technałohij «Bucefał», kiraŭnikom internet-časopisa infographer.by i kaardynataram prajekta «Narodny žurnalist».
Publikavaŭsia ŭ časopisach «Dziejasłoŭ», «Maładość», «Pamiž», «pARTtisan», a taksama ŭ zborniku «Parachodzik sučasnaści».
