Jak stała viadoma «Našaj Nivie», niekalki dzion tamu byŭ zatrymany pravasłaŭny śviatar z Hatava Kanstancin Burykin.
Zatrymańnie, pa niepaćvierdžanaj infarmacyi, adbyłosia ŭ piatnicu, pa jahonym prylocie z ZŠA, dzie jon znachodziŭsia pa linii Fiederacyi paŭerliftynhu. Zatrymlivała jaho, imavierna, HUBAZiK Ministerstva ŭnutranych spraŭ.
Burykin byŭ viadomy z časoŭ svajoj aktyŭnaści ŭ nieanacysckaj arhanizacyi «Ruskaje nacyjanalnaje adzinstva», abo RNIE.
U 2014 hodzie staŭsia skandał, kali raskryłasia, što ŭ śviatara z tych časoŭ na plačy zastajecca svastyka. Tady Burykin u intervju ŚMI adroksia svaich byłych zachapleńniaŭ.
Pry hetym jon zachoŭvaŭ kantakty z prarasijskaj arhanizacyjaj «Rumoł», na bazie jahonaha prychodu hetaja supołka pravodziła spabornictvy.
Śviatar Burykin sa svaimi paplečnikami z RNIE.
Burykin rodam z Omska, ale jahonyja siastra i baćki taksama žyvuć u Minsku.
Hramadzianstva biełaruskaha Burykin nie mieŭ. Što cikava, nie mieŭ jon i duchoŭnaj adukacyi, a śviatarski san atrymaŭ razam z abiacańniem zbudavać chram u Hatavie — rabočym pryharadzie Minska.
Akramia śviatarskaj dziejnaści, jon byŭ pieršym namieśnikam staršyni Biełaruskaj fiederacyi paŭerliftynhu, jakoj kiravaŭ Hienadź Kaleśnik, staršynia BFST «Dynama». Pa našaj infarmacyi, usimi finansavymi spravami fiederacyi zajmaŭsia Burykin, rola Kaleśnika tam była simvaličnaja. Praź fiederacyju Burykinu ŭdavałasia naładžvać suviazi sa strukturami MUS.
Kanstancin Burykin kiravaŭ Fiederacyjaj paŭerliftynhu.
U chramie, nastajacielem jakoha pracuje Burykin, «Našaj Nivie» skazali, što ŭžo niekalki dzion śviatara nie bačyli.
«Pra milicyju ničoha nie čuŭ. Ale Burykin, zdajecca, kudyści źjechaŭ — ci to za miažu, ci to jašče kudy», — paviedamiŭ nam adzin z achoŭnikaŭ carkvy.
Asabisty numar Burykina niedastupny. Ukantakt jon apošni raz zachodziŭ u piatnicu.
Byłaja ciešča Burykina, Taisija, pra zatrymańnie svajho byłoha ziacia čuła ad unučki Alaksandry, dački Burykina. Ale padrabiaznaściej, kaža, nie viedaje. «Napeŭna, nie chočuć mianie zasmučać», — miarkuje Taisija.
Asabistaja historyja ŭ Burykina niezvyčajnaja. Jahonaja pieršaja žonka pamierła 9 hadoŭ tamu, pakinuŭšy čaćviora dziaciej.
Paśla hetaha Burykin ažaniŭsia ź siadziełkaj — dziaŭčynaj, jakaja dapamahała hladzieć žonku ŭ časie jaje chvaroby.
«Naša Niva» znajšła byłoha pryjomnaha syna Burykina. Jak akazałasia, u jaho byŭ vialiki kanflikt z baćkam. Jon śćviardžaje, što baćka jaho vyhnaŭ. (Bolš infarmacyi čytajcie na NN.BY paźniej.)
Cikava, što biełaruskim RNIE doŭhi čas kiravaŭ Andrej Sakovič — stryječny brat Burykina i chrosny baćka taho syna Burykina, jakoha jon paśla adroksia.
Taksama cikava, što blizki svajak pieršaj žonki Burykina słužyć na vysokaj pasadzie ŭ bryhadzie śpiecnaza 3214.
U Biełaruskaj pravasłaŭnaj carkvie fakt zatrymańnia śviatara paćvierdzili.
«Ale kamientavać ničoha pakul nie mahu, — paviedamiŭ «Našaj Nivie» protaijerej Siarhiej Lepin, staršynia Sinadalnaha infarmacyjnaha adździeła BPC. — Nie viedajem pakul ani za što jaho zatrymali, ani kali dakładna. Zdajecca, ci to dzień tamu, ci to dva. Kali atrymajem niejkuju infarmacyju ad śledčych, tady i prakamientujem padrabiaźniej».
Śviatar Burykin i mitrapalit Minski i Zasłaŭski Pavieł.
Siłavyja struktury pakul nie adkazali, za što byŭ zatrymany Burykin. Tamu my nie budziem publikavać toje, što nam viadoma ź nieaficyjnych krynic. Možna tolki skazać, što padazreńni surjoznyja. Siarod ich znajomyja sa spravaj nazyvajuć zachoŭvańnie zbroi.
Bolš pra spravu Burykina čytajcie na NN.BY paźniej.
