Žychar horada Žytkavičy ŭdaryŭ nažom u hrudzi vypadkovaha spadarožnika ŭ ciahniku Brest—Viciebsk, paviedamiŭ BiełTA namieśnik načalnika Łuninieckaha RAUS Alaksandr Jakaviec.
Svarka pamiž pasažyrami ahulnaha vahona ŭźnikła ŭ darozie ŭ rajonie stancyi Łachva Łuninieckaha rajona. Znachodziačysia ŭ stanie mocnaha ałkaholnaha apjanieńnia, 40-hadovy žychar horada Žytkavičy naŭmysna nanios 50-hadovamu žycharu Połackaha rajona niekalki udaraŭ suvienirnym nažom u vobłaść hrudnoj kletki. Adzin z udaraŭ piacisantymietrovym lazom pryjšoŭsia ŭ vobłaść lohkaha. Mužčyn źniali ź ciahnika ŭ Mikaševičach. Paciarpiełaha z dyjahnazam «levy pnieŭmatoraks» špitalizavali ŭ rajonnuju balnicu. Jaho kryŭdziciela źmiaścili ŭ IČU.
Jak paźniej rastłumačyŭ svaje dziejańni padazravany, jamu zdałosia, što mužčyna čaplaŭsia da jaho niepaŭnaletniaj dački.
Łuniniecki RASK raspačaŭ u dačynieńni da padazravanaha kryminalnuju spravu pa č.1 st.147 (naŭmysnaje pryčynieńnie ciažkich cialesnych paškodžańniaŭ) KK. Sankcyja artykuła praduhledžvaje pakarańnie ŭ vyhladzie abmiežavańnia voli na termin ad troch da piaci hadoŭ abo pazbaŭleńnia voli na termin ad čatyroch da vaśmi hadoŭ.
