Alaksiej Biesarabaŭ i Dźmitryj Štyblikaŭ
Fiederalnaja słužba biaśpieki Rasijskaj Fiederacyi apublikavała kadry nibyta pryznańniaŭ ludziej, zatrymanych u Krymie jak ukrainskich «dyviersantaŭ».
Pra heta pišuć «RIA Novosti» sa spasyłkaj na Centr hramadskich suviaziaŭ FSB Rasii.
Aryštavanyja ŭ Sievastopali Alaksiej Biesarabaŭ i Dźmitryj Štyblikaŭ na videa kažuć, što im nibyta daručyli padrychtoŭku dyviersij i zbor vyvieddadzienych u Krymie.
«Da ŭvachodžańnia Kryma ŭ skład Rasiei ja pracavaŭ pad lehiendaj žurnalista hramadskaj arhanizacyi Centr «Nomos», — raspavioŭ Štyblikaŭ na kamieru.
Pavodle jaho słoŭ, hetaja arhanizacyja źbirała infarmacyju pra biaśpieku Čarnamorskaha rehijona, vyvučała ŭnutrypalityčnuju abstanoŭku, dziejnaść nacyjanalistyčnych arhanizacyj, «kazackich» arhanizacyj i arhanizacyj krymskich tatar.
Paśla anieksii Kryma Rasijaj Štyblikaŭ «pamianiaŭ lehiendu» i, pavodle jaho słoŭ, uładkavaŭsia pracavać u adno z adździaleńniaŭ Ministerstva abarony Rasii jak cyvilny słužačy.
Pa słovach mužčyny, u jaho zadačy ŭvachodzili «zbor raźviedvalnaj infarmacyi ab dysłakacyi i arhanizacyi novych čaściej Uzbrojenych sił Rasii na terytoryi Kryma, adbor abjektaŭ dla ažyćciaŭleńnia dyviersij, zbor raźviedvalnaj infarmacyi i dadzienych ab składzie, dysłakacyi, arhanizacyjna-štatnaj struktury, zadačy vajskovych padraździaleńniaŭ na terytoryi Kryma», a taksama aśviatleńnie infarmacyi ab vajskovych vučeńniach u Krymie.
Biesarabaŭ śćviardžalna adkazaŭ na kamieru: «Ja vajennasłužačy Ministerstva abarony Ukrainy». Pavodle jaho słoŭ, jon pracavaŭ refierentam i staršym refierentam infarmacyjna-analityčnaha adździeła VMS Ukrainy ŭ Adesie, a paźniej — aficeram adździeła śpiecyjalnaj raźviedki štaba VMS.
Na minułym tydni FSB RF zajaviła, što 9 listapada ŭ Sievastopali zatrymali «ŭdzielnikaŭ dyviersijna-terarystyčnaj hrupy Hałoŭnaha ŭpraŭleńnia raźviedki Minabarony Ukrainy». Paźniej vyśvietliłasia, što zatrymali Biesarabava Alaksieja Jaŭhienaviča, Štyblikava Dźmitryja Anatoljeviča i Dudka Uładzimira Michajłaviča.
Troch padazravanych u padrychtoŭcy dyviersij aryštavali.
Kiraŭnictva vyviedki Minabarony Ukrainy admaŭlaje, što ŭ Krymie zatrymali jaho supracoŭnikaŭ.
