«Nielha dapuścić, kab Alaksandr Łukašenka vybiraŭ, chto z apazicyjanieraŭ jamu padabajecca, kab pryznačać ich deputatami», — zajaviŭ staršynia Abjadnanaj hramadzianskaj partyi (AHP) Anatol Labiedźka na kansultacyjach pradstaŭnikoŭ biełaruskich apazicyjnych arhanizacyj i deputataŭ litoŭskaha siejma, što prachodziać 11 listapada ŭ Vilni.
Ź biełaruskaha boku ŭ pieramovach taksama ŭdzielničajuć sustaršynia kampanii «Havary praŭdu» Taćciana Karatkievič, staršynia ruchu «Za Svabodu» Juraś Hubarevič, sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski, kiraŭnik arhkamiteta pa stvareńni Biełaruskaj sacyjał-demakratyčnaj partyi «Narodnaja Hramada» Mikałaj Statkievič, namieśnik staršyni Biełaruskaj partyi «Zialonyja» Dźmitryj Kučuk i kiraŭnik Biełaruskaj sacyjał-demakratyčnaj partyi (Hramada) Iryna Vieštard.
Vybaraŭ u Biełarusi niama, padkreśliŭ Labiedźka. «My nie ŭžyvali słova «parłamient» — jaho ŭ krainie prosta niama. Deputaty vykonvajuć funkcyi čynoŭnika, hałoŭnaja zadača jakich — pravilna hałasavać», — skazaŭ palityk.
Pavodle słoŭ Labiedźki, u spravie praviadzieńnia ŭ Biełarusi demakratyčnych pieraŭtvareńniaŭ u apazicyi «jość vielmi mocny sajuźnik — ekanamičny i finansavy kryzis». «Heta krynica surjoznaha ŭździejańnia na ŭłady Biełarusi, u tym liku z boku mižnarodnaj supolnaści», — ličyć jon.
«Ciapier u Łukašenki situacyja vielmi składanaja: vyčarpałasia finansavaja padtrymka Rasii, ułady čaplajucca za lubyja hranty i dapamohu. Na viasnovuju siesiju Pałaty pradstaŭnikoŭ my praz deputata Hannu Kanapackuju vyniesiem papraŭki ŭ vybarčaje zakanadaŭstva, jakija hruntujucca na rekamiendacyjach BDIPČ ABSIE. Kali budzie mižnarodny nacisk, jość šanc, što ŭłady pojduć na ich pryniaćcie», — skazaŭ Labiedźka.
Pavodle jaho słoŭ, miascovaja vybarčaja kampanija, jakaja adbudziecca praz hod, «pavinna stać łakmusavaj papieraj, kab zrazumieć, kudy idzie ŭłada». Pry hetym palityk padkreśliŭ: «Vielmi važna, kab siejm Litvy pryznaŭ parłamienckija vybary 2016 hoda niesapraŭdnymi».
