Čatyry staličnyja hateli, jakija naležać Kiraŭnictvu spravami prezidenta, u najbližejšy čas abjadnajuć u chołdynh. Kiravać im budzie były ministr pradprymalnictva i inviestycyj, palaŭničy i biznesmien Alaksandr Sazonaŭ.
Były ministr zachaplajecca palavańniem.
U padnačaleńni ŭ Sazonava buduć «Prezident-hatel», hatel «Płanieta», haściničny kompleks «Jubilejny» i hatel «Minsk», dyrektaram jakoha mienš za miesiac tamu pryznačyli žonku źbiehłaha prezidenta Kyrhyzstana Kurmanbieka Bakijeva Nazhuła Tałamušavu. Siońnia ŭsie hetyja hateli znachodziacca ŭ padparadkavańni Kiraŭnictva spravami prezidenta.
Chto taki Alaksandar Sazonaŭ?
Alaksandr Sazonaŭ daŭno syšoŭ z palityčnaha alimpu, choć byli časy, kali partrety ministra pradprymalnictva i inviestycyj Biełarusi drukavali na vokładkach niekatorych časopisaŭ.
Sazonavu 53 hady.
Jon skončyŭ Sarataŭskaje vyšejšaje vajskovaje inžyniernaje vučylišča chimičnaj abarony. Pracavaŭ majstram, hałoŭnym technołaham cecha pa vytvorčaści chimpradukcyi vajskovaha pryznačeńnia Volskaha filijała Dziaržaŭnaha sajuznaha NDI arhaničnaj chimii i technałohii. Zatym pracavaŭ na Krymskim vytvorčym abjadnańni «Chimpram», Minskim elektramiechaničnym zavodzie, vytvorča-kamiercyjnym kancernie «Niamiha».
Z žonkaj Marynaj, śpiavačkaj Anžalikaj Jalinskaj i deputatam Ramanam Anańjevym.
Da 1994 hoda byŭ hienieralnym dyrektaram TAA «SA-NOV», jakoje zajmałasia biznesam pa vytvorčaści i realizacyi biezałkaholnych napojaŭ, pastaŭkach i prodažach charčovych dabavak.
U 1994 hodzie pryznačany pamočnikam prezidenta Respubliki Biełaruś, u lipieni 1996 h. — ministram pradprymalnictva i inviestycyj. Na pasadzie prabyŭ amal čatyry hady.
Zatym znoŭ staŭ pamočnikam prezidenta — adkazvaŭ za Minsk. U 2000 hodzie Sazonaŭ syšoŭ z ułady. Presa pisała pra toje, što asnoŭnaj pryčynaj adstaŭki Sazonava stali vybary ŭ Pałatu pradstaŭnikoŭ. Pa ich viersii, Sazonaŭ byŭ pryznačany pamočnikam prezidenta jakraz pad parłamienckija vybary i adstaŭka kaža pra toje, što prezident byŭ niezadavoleny chodam vybarčaj kampanii ŭ Minsku. Adnak sam Sazonaŭ kazaŭ, što adstaŭka adbyłasia pa jaho inicyjatyvie.
Alaksandr Jurjevič syšoŭ u biznes. Voś što napisana ŭ jaho reziume: «Studzień 2001 hoda — vierasień 2003 h. — staršynia rady dyrektaraŭ TAA «Stełs», vierasień 2003 — śniežań 2008 — dyrektar pradstaŭnictva ŭ Biełarusi Hrupy kampanij «Jeŭraservis» (Sankt-Pieciarburh).
Kiraŭnictva prajektami kampanii ŭ RB u śfiery: cukrovaja halina, miasapierapracoŭka (2 zavody), ihralny biznes (3 zały), zavody pa vytvorčaści kardonu. Stvareńnie i ahulnaje kiraŭnictva dvuma handlovymi damami, stvoranymi kampanijaj sumiesna ź Dziaržaŭnym kancernam «Biełcharčpram».
Vyvad prajektaŭ na dadatnuju rentabielnaść».
Siońnia Sazonaŭ — adzin z namieśnikaŭ dyrektara «Prezident-hatela».
Amatar pryhožych žančyn: ź Vikaj Cyhanovaj.
Były ministr i biznesmien žyvie ŭ pryvatnym domie, jaki budavaŭ nie adzin hod, taksama surjozna zachaplajecca palavańniem. Jon ščaśliva žanaty, maje syna i ŭnuka.
Dom, u jakim žyvie były ministr.
Na svajoj staroncy ŭ adnoj z sacyjalnych sietak Alaksandr Sazonaŭ paprostu dzielicca sa svaimi siabrami padrabiaznaściami svajho asabistaha žyćcia, vykładvaje svaje fatahrafii z zorkami estrady i inšymi viadomymi asobami.
Darečy, vielmi śmiešna padpisvaje niekatoryja fatahrafii ź minułaha palityčnaha žyćcia. Voś jak, naprykład, hetuju: «Z Prezidentam i Premjeram 1996. Ja ŭ centry».
