Hramadzianin Rasii, jaki abvinavačvajecca ŭ chakierskich napadach na celi ŭ ZŠA, siońnia zatrymany ŭ pražskim hateli ŭ chodzie sumiesnaj apieracyi češskaj palicyi i FBR, piša Financial Times. Hazieta adznačaje, što zatrymańnie adbyłosia mienš čym praz dva tydni paśla taho, jak amierykanskija śpiecsłužby aficyjna abvinavacili Maskvu ŭ arhanizacyi ŭzłomu pošty Demakratyčnaj partyi ZŠA.
Mužčyna znachodziŭsia ŭ vyšuku pa linii Interpała, pryčym na jaho byŭ vypisany «čyrvony» order, paviedamiŭ sajt češskaj palicyi. Taki order patrabuje ad krain, jakija ŭvachodziać u Interpał, zatrymać padazravanuju asobu dla ekstradycyi ŭ krainu, jakaja jaho šukaje — u dadzienym vypadku, u ZŠA. Rašeńnie ab ekstradycyi budzie prymać miascovy sud, jaki ŭžo aryštavaŭ padazravanaha.
Pry zatrymańni rasijanin nie akazaŭ supracivu, adnak nieŭzabavie jamu stała kiepska, paviedamiła palicyja. Palicyjanty vyklikali jamu chutkuju dapamohu. Jaho imia nie nazyvajecca, ale pakazvajecca, što jon raźjazdžaŭ pa Čechii ź siabroŭkaj na aŭtamabili kłasa luks.
Pasolstva Rasii ŭ Čechii atrymała apaviaščeńnie pra zatrymańni rasijskaha hramadzianina i robić usio mahčymaje dla abarony jaho intaresaŭ, paviedamiŭ pres-sakratar pasolstva ŭ Prazie Alaksiej Kałmakoŭ. Jon zajaviŭ, što Rasija nastojvaje na pieradačy rasijskaha hramadzianina ŭ Rasiju. «Rasijski bok abviarhaje praktyku ažyćciaŭleńnia eksterytaryjalnaj jurysdykcyi, jakuju ZŠA naviazvajuć usiamu śvietu», — skazaŭ dypłamat.
Pres-sakratar prezidenta Rasii Dźmitryj Piaskoŭ skazaŭ, što nijakaj infarmacyjaj pra zatrymanaha Kreml nie maje.
