Ukazam hienieralnaha prakurora Biełarusi Alaksandra Kaniuka ad 30 vieraśnia Hienadź Dysko pryznačany na pasadu namieśnika hienieralnaha prakurora. Da hetaha Dysko byŭ prakuroram Viciebskaj vobłaści.
Hienadziu Dysko 52 hady, jon rodam z Ašmian. Skončyŭ Charkaŭski jurydyčny instytut. Ad 1997 da 2006 hoda pracavaŭ prakuroram Ščučynskaha rajona. Paśla heta jon byŭ pryznačany hałoŭnym prakuroram Viciebskaj vobłaści.
Praca na Viciebščynie dla Hienadzia Dysko nie była biaschmarnaj. U žniŭni 2011 hoda tahačasny hienieralny prakuror Ryhor Vasilevič adpraviŭ Dysko ŭ adstaŭku ŭ suviazi z «nienaležnym rasśledavańniem vybuchu ŭ Viciebsku».
Sprava ŭ tym, što ŭ toj hod adbyŭsia vybuch u minskim mietro, byli schoplenyja viciebskija chłopcy Dźmitryj Kanavałaŭ i Uładzisłaŭ Kavaloŭ. U vyniku rasśledavańnia stali viadomyja novyja padrabiaznaści, u tym liku terakta ŭ Viciebsku ŭ 2005 hodzie, jaki tam taksama arhanizavaŭ Kanavałaŭ. U suviazi z hetym Vasilevič i adpraviŭ Dysko ŭ adstaŭku.
Paśla hetaha padziei stali raźvivacca dastatkova dziŭna. 20 vieraśnia 2011 Łukašenka adpraŭlaje ŭ adstaŭku ŭžo samoha Ryhora Vasileviča, a na jaho miesca pryznačaje Alaksandra Kaniuka. Adnym ź pieršych ukazaŭ novaha hienieralnaha prakurora (ad 29 vieraśnia 2011) było ŭznaŭleńnie na pasadzie taho samaha Hienadzia Dysko, jaki prabyŭ u adstaŭcy krychu bolš za miesiac.
Letaś chadzili čutki, što Hienadź Dysko moža stać kiraŭnikom Śledčaha kamiteta, adnak vybar paŭ na prakurora Bresckaj vobłaści Ivana Naskieviča.
Hienadź Dysko pryznačany namieśnikam hienieralnaha prakurora zamiest Mikałaja Kuklisa.
