Ispanski vizavy centr u Minsku z 11 kastryčnika spynić pryjom zajaŭ. Infarmacyja pra heta raźmieščanaja na sajcie centra.
«Pačynajučy z 11 kastryčnika 2016 hoda VFS Global u Biełarusi bolš nie budzie prymać zajavy na šenhienskuju vizu ad imia ispanskaha hienieralnaha konsulstva ŭ Maskvie», — havorycca ŭ paviedamleńni.
U centry prosiać źviarnuć uvahu na toje, što sajt vizavaha centra, koł-centr i daviedka pa elektronnaj pošcie buduć dastupnyja tolki da 10 kastryčnika. Pry ŭźniknieńni lubych pytańniaŭ z 11 kastryčnika nieabchodna nakiroŭvać ich u ispanskaje hienieralnaje konsulstva ŭ Maskvie.
Razam z tym biełarusy mohuć pa-raniejšamu adkryvać vizy ŭ Ispaniju praz pasolstva Łatvii i vizavy centr Łatvii ŭ Minsku.
Vizavy centr Ispanii źjaviŭsia ŭ Minsku adnym ź pieršych — jon byŭ adkryty 31 maja 2013 hoda. Pra pryčyny ciapierašnich źmien u jaho dziejnaści nie paviedamlajecca.
Miž tym, jak paviedamlajuć rasijskija ŚMI, ispanskija vizavyja centry pad kiravańniem VFS Global 11 kastryčnika začyniajucca i ŭ Rasii. Novy tendar pa kiravańni pracesinhavymi centrami ispanskich viz za miažoj vyjhrała BLS International Services Ltd.
