List Biełarusi ab namierach da Mižnarodnaha valutnaha fondu budzie dapracavany, zajaviŭ žurnalistam staršynia praŭleńnia Nacyjanalnaha banka Pavieł Kałaŭr pa vynikach narady ŭ kiraŭnika dziaržavy pa pytańniach uzajemadziejańnia z MVF, jakaja prajšła 3 kastryčnika.
U adpaviednaści z praviłami MVF, kraina, jakaja pretenduje na atrymańnie finansavańnia, nakiroŭvaje adpaviedny list ab namierach. Da jaho prykładajecca miemarandum ab kankretnych makraekanamičnych dziejańniach.
Na naradzie Alaksandr Łukašenka adznačyŭ, što jamu prapanoŭvajuć padpisać list na imia kiraŭnika MVF Kryścin Łahard, jakoje idzie nasupierak z dadzienymi narodu abiacańniami. «Heta źnievažalna nie tolki dla mianie. Heta źnievažalna ŭ dačynieńni da našaha naroda», — zajaviŭ Łukašenka.
Pavieł Kałaŭr skazaŭ paśla žurnalistam, što list budzie dapracavany. «Biezumoŭna, z ulikam siońniašniaj narady ŭ kiraŭnika dziaržavy i kansultacyj u Vašynhtonie, my dapracujem hety list z ulikam niepasredna intaresaŭ našaj dziaržavy. I pry nieabchodnaści nakirujem jaho ŭ MVF. Kankretnaje napaŭnieńnie listy my ŭzhodnim, niepasredna pravioŭšy kansultacyi spačatku ŭ Vašynhtonie z kiraŭnictvam Mižnarodnaha valutnaha fondu, a potym ŭnutry našaj krainy», — cytuje Kałaura dziaržaŭnaje ahienctva BiełTA.
«Havorka idzie ab prahramie pašyranaha finansavańnia z boku MVF u padtrymku tych dziejańniaŭ i namieraŭ, jakija ŭžo pa vialikim rachunku praduhledžany ŭ prahramie pracy ŭrada na najbližejšyja piać hadoŭ», — skazaŭ kiraŭnik Nacbanka.
Pavodle jaho słoŭ, viaducca pieramovy ab vydzialeńni Biełarusi 3 młrd dołaraŭ prykładna pad 2,3% terminam na 10 hadoŭ. «Usio heta zaležyć ad stanu płaciežnaha bałansu krainy i ad tych damoŭlenaściaŭ, jakija buduć dasiahnuty pamiž Biełaruśsiu i MVF», — adznačyŭ Kałaŭr.
Abmierkavańnie na naradzie budavałasia zychodziačy z taho, što ceły šerah pytańniaŭ u hetaj śfiery maje adčuvalny charaktar, padkreślivałasia nieabchodnaść abarony sacyjalna ŭraźlivych słajoŭ nasielnictva. U pieršuju čarhu heta datyčycca taryfaŭ na žyllova-kamunalnyja pasłuhi. «Pieramoŭny praces z MVF jakraz maksimalna ŭličvaje ŭsie ŭstanoŭki kiraŭnika dziaržavy, i delehacyja Biełarusi litaralna zaŭtra vylataje na štohadovy schod MVF, dzie kansultacyi pa prahramie buduć praciahnuty», — zajaviŭ Kałaŭr.
Napiaredadni misija MVF zaviaršyła čarhovy etap pieramoŭnaha pracesu z uładami Biełarusi ŭ Minsku. Paśla kansultacyj u Vašynhtonie dalejšyja kantakty pa novaj kredytnaj prahramie buduć praciahnuty z dapamohaj videakanfierencyj abo čarhovych asabistych sustreč, raskazaŭ kiraŭnik Nacbanka.
