Z momantu ŭviadzieńnia Rasijaj śpiecyjalnych ekanamičnych mier mytnymi orhanami Biełarusi vyjaŭlena kala 1,4 tys. administracyjnych pravaparušeńniaŭ, abjektami jakich ź`iaŭlalisia 12,9 tys. ton tavaraŭ. Ich košt skłaŭ bolš za 11 młn dołaraŭ, paviedamiła pres-słužba Dziaržaŭnaha mytnaha kamiteta Biełarusi.
Jak adznačajuć biełaruskija mytniki, na pastajannaj asnovie pravodzicca kompleks mierapryjemstvaŭ pa niedapuščeńni niezakonnaha vyvazu ź Biełarusi ŭ Rasiju hetaj katehoryi tavaraŭ. Pierš za ŭsio na źniešniaj miažy mytnikami spyniajecca pierasoŭvańnie tavaraŭ, jakija iduć u adras rasijskich sub`iektaŭ haspadarańnia i jakija padpadajuć pad dziejańnie śpiecyjalnych ekanamičnych mier, uviedzienych Rasijaj. Akramia taho mabilnyja hrupy mytnych orhanaŭ pravodziać mierapryjemstvy pa spynieńni sprob niezakonnaha vyvazu ź Biełarusi tavaraŭ sankcyjnaj hrupy, jakija raniej byli vypuščanyja mytnymi orhanami Biełarusi dla ŭnutranaha spažyvańnia.
***
Jak paviedamlałasia, Alaksandr Łukašenka 26 vieraśnia padčas rabočaj sustrečy sa staršynioj DMK Juryjem Siańko zajaviŭ, što Rasija pry abaronie intaresaŭ na zachodnim napramku abapirajecca na mytnyja orhany Biełarusi. «Mianie cikaviać fakty, jakija naściarožvajuć. Ja chaču mieć poŭnuju infarmacyju pra pasłuhi, jakija my akazvajem Rasijskaj Fiederacyi (Rasija ž tolki dziakujučy našaj mytni abaraniaje svaje intaresy na zachodnim napramku, i abapirajecca jana na mytnyja orhany Biełarusi), kab ja byŭ u kursie spravy dla razmovy z kiraŭnictvam Rasijskaj Fiederacyi», — skazaŭ Łukašenka.
Razam z tym u Maskvie 29 vieraśnia na pasiadžeńni kalehii Hienprakuratury aficyjna zajavili, što pravaachoŭnyja orhany Rasii fiksujuć vialikija nieadpaviednaści pamiž ab`iomam sielskahaspadarčaj pradukcyi, jakaja ŭvozicca z sumiežnych krain, i ab`iomam aficyjna vyraščanaj. «Zabaronienyja da ŭvozu ŭ Rasii tavary niaredka pastaŭlajucca pa padroblenych tavarasupravadžalnych i fitasanitarnych dakumientach. Tak, naprykład, u 2015 hodzie ŭ Rasiju impartavana 573 tys. ton biełaruskich jabłykaŭ i hryboŭ. Pavodle danych Minsielhasa Biełarusi, heta ŭ piać razoŭ pieravyšaje sabrany ŭradžaj», — cytavała TASS namieśnika hienprakurora Rasii Uładzimira Malinoŭskaha. Pavodle jaho słoŭ, situacyju paharšaje adsutnaść fitasanitarnaha kantrolu tavaraŭ, što ŭvoziacca, na miažy Rasii i Biełarusi.
Rasija ŭviała charčovaje embarha u jakaści sankcyj u adkaz na abmiežavalnyja miery zachodnich krain, jakija byli inicyjavanyja ŭ suviazi z dałučeńniem ŭkrainskaha Kryma i situacyjaj u Danbasie. Pucin padpisaŭ ukaz, jaki abmiažoŭvaje ŭvoz peŭnych praduktaŭ z ZŠA, ES, Kanady, Aŭstralii i Narviehii, u žniŭni 2014 hoda. Paźniej jaho raspaŭsiudzili na Ałbaniju, Čarnahoryju, Isłandyju i Lichtenštejn, jakija dałučylisia da antyrasijskich sankcyj. U kancy minułaha hoda ŭ hety śpis uvajšła i Ukraina.
