Biełaruś i Rasija abmiarkoŭvajuć asobnyja momanty zamieny korpusa reaktara dla Biełaruskaj AES, paviedamiŭ namieśnik ministra enierhietyki Michaił Michadziuk 14 vieraśnia ŭ Minsku na pres-kanfierencyi pa vynikach druhoha raŭnda dvuchbakovych kansultacyj ekśpiertaŭ ź Biełarusi i Litvy pa techničnych i navukovych pytańniach prajekta budavańnia BiełAES.
«Incydent, źviazany z korpusam reaktara, šyroka aśviatlaŭsia ŭ ŚMI, — skazaŭ čynoŭnik. — Heta było źviazana z parušeńniem praviłaŭ pieramiaščeńnia hruzaŭ kranami. Šerah słužbovych asob parušyŭ hetyja praviły, i adbyłasia niaštatnaja situacyja. Ź pieršaj chviliny jana staranna analizavałasia jak rehulataram, tak i zakazčykam sumiesna z hienpadradčykam, pravodziŭsia kompleks rasśledavańniaŭ. Pa vynikach biełaruski bok pryniaŭ rašeńnie ab zamienie hetaha korpusa reaktara. My pra heta apaviaścili rasijski bok, rasijski bok heta rašeńnie pryniaŭ, nas pačuli».
«Siońnia abmiarkoŭvajucca techničnyja momanty ŭ ramkach hienieralnaha kantrakta pa jaho zamienie», — skazaŭ namieśnik ministra enierhietyki.
Incydent na AES, jakaja budujecca, adbyŭsia 10 lipienia, ale viadoma pra jaho stała tolki 25 lipienia z paviedamleńniaŭ u sacsietkach i ŚMI. Padčas vyprabavalnaj trenirovačnaj ustanoŭki korpusa reaktara 330-tonny ahrehat sarvaŭsia i ŭpaŭ z vyšyni ad dvuch da čatyroch mietraŭ.
Reakcyju na incydent Alaksandr Łukašenka nazvaŭ «zvyčajnaj kankurencyjaj», «palityzacyjaj» i «bałbatnioj». Padčas pajezdki ŭ Viciebskuju vobłaść 4 žniŭnia jon, u pryvatnaści, zajaviŭ: «Niekatoryja dapisalisia, i navat rasijanie (bolš za ŭsio rasijskija srodki masavaj infarmacyi) — «upaŭ reaktar na atamnaj stancyi, jakaja budujecca ŭ Biełarusi». Dy pračniciesia: tam nijakaha reaktara jašče i niama, tam jość mietaličny korpus — «bočka» — taŭščynioj 20 sm, u jaki budzie źmieščany reaktar. Mnie dałažyli na ranicu, kali hety incydent adbyŭsia. Jany [budaŭniki] pieramiaščali jaho na składzie, treniravalisia padymać. Jaho padniali na moj rost, moža, krychu vyšej, stropy nie vytrymali, i hetaja «bočka» adnym krajem upała na ziamlu, ź jakoj jaje padniali». Pavodle słoŭ Łukašenki, jamu pradstavili kadry hetaha incydentu, i jon adrazu ž daručyŭ nieadkładna razabracca z tym, što adbyłosia. «Navat kali jość najmienšyja paškodžańni abo drapiny, my ad hetaha korpusa pavinny admovicca. I rasijanie kažuć, što kali biełarusy admoviacca ad hetaha korpusa, to jany pryviazuć inšy i ŭstanoviać. Voś i ŭvieś incydent», — skazaŭ jon.
11 žniŭnia ministr enierhietyki Uładzimir Patupčyk padčas vizitu ŭ Ciumień (Rasija) zajaviŭ, što Minsk pryniaŭ rašeńnie zamianić korpus reaktara dla enierhabłoka BiełAEC, jakaja budujecca. Kažučy ab košcie zamieny abstalavańnia, ministr adznačyŭ, što heta — pradmiet pieramoŭ z rasijskim bokam.
Paśla incydentu Litva, jakaja na praciahu apošnich hadoŭ krytykuje budaŭnictva AES la svaich miežaŭ, nakiravała Biełarusi čarhovuju notu, u jakoj zaprasiła vyniki rasśledavańnia padziej. Litoŭskija ŭłady prapanavali Minsku stvaryć mižnarodnuju kamisiju ekśpiertaŭ dla analizu vynikaŭ hetaha rasśledavańnia i pradastaŭleńnia rekamiendacyj, paprasili aktyŭnaha ŭmiašańnia ES u vyrašeńnie pytańnia jadziernaj biaśpieki, važnaha dla ŭsiaho rehijonu, a taksama źviarnulisia da kiraŭnictva MAHATE z prośbaj udzielničać u rasśledavańni hetaha i inšych incydentaŭ, jakija adbylisia na stancyi.
