UUS Minharvykankama abvierhła infarmacyju ab aryšcie naziralnika kampanii «Prava vybaru» Leanida Kułakova na vybarčym učastku, dzie jon naziraŭ za vybarami.
Jak vynikaje z paviedamleńnia, raźmieščanaha na aficyjnym sajcie HUUS, 11 vieraśnia ŭ 22.50 u skviery pa vulicy Karbyšava Leanid Kułakoŭ i jašče dvoje hramadzian (mužčyna i žančyna) byli zatrymanyja supracoŭnikami Pieršamajskaha adździeła departamienta achovy za raśpivańnie ałkaholnych napojaŭ u hramadskim miescy i dastaŭlenyja ŭ Pieršamajskaje RUUS Minska.
«U rajonnym UUS u dačynieńni da zatrymanych byli składzienyja pratakoły ab administracyjnych pravaparušeńniach pavodle častki 1 artykuła 17.3 (raśpivańnie ałkaholnych, słabaałkaholnych napojaŭ ci piva ŭ hramadskim miescy abo źjaŭleńnie ŭ hramadskim miescy ci na pracy ŭ stanie apjanieńnia) i artykuła 23.4 (niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni joju słužbovych paŭnamoctvaŭ) Kodeksa ab administracyjnych pravaparušeńniach Respubliki Biełaruś, — havorycca ŭ paviedamleńni. — Paśla hetaha mužčyny byli dastaŭlenyja ŭ śpiecyjalizavany izalatar Pieršamajskaha RUUS (miedvyćviareźnik), dzie i byli ahledžanyja dziažurnym uračom — u abodvuch analizy pakazali ŭtrymańnie ŭ kryvi pryblizna 1 pramile ałkaholu».
12 vieraśnia sudom Pieršamajskaha rajona pravaparušalniki byli pryciahnutyja da adkaznaści ŭ vyhladzie administracyjnaha aryštu, adznačajecca ŭ paviedamleńni.
Pra zatrymańnie Kułakova paviedamiła 12 vieraśnia pres-słužba kampanii «Prava vybaru».
