Na Dzień biełaruskaha piśmienstva, jaki projdzie 4 vieraśnia ŭ Rahačovie (Homielskaja vobłaść), upieršyniu za ŭsiu historyju hetaha śviata pryjedzie vialikaja delehacyja biełarusaŭ zamiežža, jakija žyvuć u 19 krainach, paviedamiŭ na pres-kanfierencyi 31 žniŭnia ŭ Minsku pieršy namieśnik ministra infarmacyi Ihar Łucki.
Čynoŭnik raskazaŭ, što da Dnia biełaruskaha piśmienstva ŭ cełym prymierkavana kala 100 mierapryjemstvaŭ, jakija projduć u Rahačovie i inšych haradach Biełarusi.
Tak, 2 vieraśnia ŭ Homielskaj abłasnoj univiersalnaj biblijatecy imia Lenina pry ŭdziele biełaruskich, rasijskich i ŭkrainskich piśmieńnikaŭ adkryjecca vystava, pryśviečanaja žyćciu i tvorčaści dramaturha i scenarysta, narodnaha piśmieńnika BSSR Andreja Makajonka. U toj ža dzień u Homieli adbudziecca ŭračystaje adkryćcio X Mižnarodnaha fiestyvalu «Słavianskija litaraturnyja dažynki», a taksama projdzie ŭznaharodžańnie pieramožcaŭ abłasnoha litaraturnaha konkursu «Pravasłaŭje — maja nadzieja».
Ranicaj 3 vieraśnia ŭ Nacyjanalnaj biblijatecy ŭ Minsku adbudziecca dziasiaty mižnarodny kruhły stoł «Suhučča. Słova Skaryny ŭ sučasnym śviecie».
U Rahačovie ŭ hety dzień pačnie pracu Fiestyval knihi i presy, projduć litaraturnyja čytańni, adkryjucca šmatlikija mastackija i litaraturnyja vystavy, u tym liku pryśviečanyja 75-hodździu z dnia naradžeńnia Uładzimira Mulavina, 95-hodździa z dnia naradžeńnia Ivana Mieleža, 120-hodździu z dnia naradžeńnia Kandrata Krapivy, 125-hodździu z dnia naradžeńnia Maksima Bahdanoviča.
Apoŭdni asnoŭnaha dnia, 4 vieraśnia, na centralnaj płoščy Rahačova adbudziecca ŭračystaja cyrymonija adkryćcia Dnia biełaruskaha piśmienstva, na jakoj haściam śviata pakažuć mastacka-teatralizavanuju pastanoŭku «Biełaruś — spradviečnaja pieśnia». Paśla hetaha na hałoŭnaj scenie buduć abvieščany imiony łaŭreataŭ Nacyjanalnaj litaraturnaj premii.
Na praciahu ŭsiaho dnia hości śviata zmohuć naviedać šmatlikija vystavy, litaraturnyja čytańni i sustrečy ź piśmieńnikami.
Dzień biełaruskaha piśmienstva ŭ Rahačovie zavieršycca cyrymonijaj pieradačy estafiety praviadzieńnia śviata Połacku, kancertam, pryśviečanym Uładzimiru Mulavinu, i fiejervierkam.