president.gov.ua
«Biełaruski ministr padziakavaŭ prezidentu Ukrainy za sadziejničańnie ŭ adnaŭleńni kanstruktyŭnaha dyjałohu Biełarusi ź Jeŭrapiejskim sajuzam», — paviedamlaje pres-słužba ŭkrainskaha lidara.
«Asobnaja ŭvaha» była nadadzienaja ekanamičnamu supracoŭnictvu pamiž dźviuma krainami. Baki «adznačyli metazhodnaść aktyvizacyi handlova-ekanamičnych adnosin za košt pašyreńnia supracoŭnictva ŭ mašynabudavańni, enierhietycy, ahrapramysłovym kompleksie i transpartnaj śfiery», a taksama važnaść praviadzieńnia čarhovaha pasiadžeńnia mižuradavaj ukrainska-biełaruskaj źmiešanaj kamisii ŭ vieraśni hetaha hoda ŭ Minsku.
Surazmoŭcy taksama padkreślili važnaść zaviaršeńnia ŭładkavańnia biełaruska-ŭkrainskaj miažy «ŭ adpaviednaści ź lepšymi suśvietnymi standartami».
Parašenka «vykazaŭ zacikaŭlenaść Ukrainy ŭ raźvićci sietki navučalnych ustanoŭ z metaj stvareńnia spryjalnych mahčymaściaŭ dla vyvučeńnia ŭkrainskaj movy ŭ rajonach kampaktnaha pražyvańnia etničnych ukraincaŭ u Biełarusi».
U čas sustrečy abmiarkoŭvalisia taksama pytańni arhanizacyi sumiesnych kulturnych mierapryjemstvaŭ u suviazi z 345-hodździem aŭtara pieršaj Kanstytucyi Ukrainy — hietmana Pilipa Orlika, jaki naradziŭsia na terytoryi sučasnaj Minskaj vobłaści.
Na sustrečy ŭ MZS kiraŭniki źniešniepalityčnych viedamstvaŭ Pavieł Klimkin i Uładzimir Makiej «paćvierdzili važnaść raźvićcia handlova-ekanamičnaha supracoŭnictva» i pahadzilisia ź nieabchodnaściu pravieści pasiadžeńnie mižuradavaj źmiešanaj kamisii «užo najbližejšym časam», paviedamiła pres-słužba ŭkrainskaha MZS.
Klimkin «prainfarmavaŭ svajho biełaruskaha kalehu ab składanaj situacyi ź biaśpiekaj humanitarnaj situacyi na akupavanych Rasijaj terytoryjach AR Krym i h. Sievastopal, a taksama na Danbasie».
U kantekście 25-hodździa abviaščeńnia niezaležnaści Ukrainy Makiej zajaviŭ: «Siońnia my razumiejem, što za niezaležnaść treba zmahacca».
Pavodle infarmacyi pres-słužby biełaruskaha źniešniepalityčnaha viedamstva, padčas dvuchdzionnaha vizitu Makiej, akramia Parašenki i Klimkina, sustreŭsia taksama ź vice-premjer-ministram — ministram rehijanalnaha raźvićcia, budaŭnictva i žyllova-kamunalnaj haspadarki Ukrainy Hienadziem Zubko i meram Kijeva Vitalem Kličko.
«Prezident Ukrainy P.Parašenka padziakavaŭ biełaruskamu boku «za bliskučuju arhanizacyju minskich pieramoŭ pa ŭrehulavańni situacyi na ŭschodzie Ukrainy». Padkreśliŭ, što minskija damoŭlenaści źjaŭlajucca biezalternatyŭnaj asnovaj dla mirnaha ŭrehulavańnia kanfliktu. Sa svajho boku U.Makiej zapeŭniŭ ŭ hatoŭnaści Biełarusi i nadalej rabić usio mahčymaje dla ŭstanaŭleńnia miru ŭ brackaj Ukrainie», — havorycca ŭ relizie.
Na sustrečy z Parašenkam abmierkavanyja taksama pytańni «aktyvizacyi palityčnaha dyjałohu, u tym liku na vyšejšym uzroŭni, pašyreńnia mižparłamienckich kantaktaŭ, miery pa aktyvizacyi handlova-ekanamičnaha ŭzajemadziejańnia, u tym liku likvidacyi štučnych barjeraŭ va ŭzajemnym handli». Asobna razhledžany pierśpiektyvy dalejšaj narmalizacyi adnosin Biełarusi ź ES i ZŠA pry sadziejničańni Ukrainy. Na sustrečy taksama padkreślena važnaść pašyreńnia humanitarnaha supracoŭnictva, vyvučeńnia biełaruskaj movy va Ukrainie i ŭkrainskaj — u Biełarusi.
Pa daručeńni Alaksandra Łukašenki Makiej pieradaŭ prezidentu Ukrainy padarunak u suviazi z 25-hodździem niezaležnaści Ukrainy — słucki pojas.
Na sustrečy ŭ MZS Makiej padkreśliŭ, što, vybudoŭvajučy dvuchbakovyja ŭzajemaadnosiny z Ukrainaj, Biełaruś «budzie kiravacca tolki svaimi nacyjanalnymi intaresami».
U Kabiniecie ministraŭ na pieramovach z Zubko abmierkavany kompleks dvuchbakovych pytańniaŭ handlova-ekanamičnaha charaktaru. Makiej «padkreśliŭ nieabchodnaść bolš efiektyŭna vykarystoŭvać mahčymaści ŭzajemadziejańnia Biełarusi i Ukrainy jak dziaržaŭ, jakija ŭdzielničajuć abo jakija imknucca da ŭdziełu ŭ roznych abjadnańniach ekanamičnaj intehracyi».
Makiej razam z kiraŭnikom Kijeŭskaj haradskoj dziaržaŭnaj administracyi Vitalem Kličko pryniali ŭdzieł va ŭračystaj cyrymonii adkryćcia žyłoha kompleksu biełaruskaj ambasady va Ukrainie. Uźviadzieńnie abjekta, jaki składajecca sa šmatkvaternaha žyłoha doma dla dypłamataŭ i rezidencyi pasła, viałosia sa śniežnia 2013 hoda.
