63-hadovy muła Amar Bienchamad i 62-hadovaja Facima Niedžar źjaŭlajucca vice-prezidentami ruchu «Isłamskaje adzinstva i reformy» (MUR) — ideałahičnaha kryła Partyi spraviadlivaści i raźvićcia.
U zvarotach da moładzi aboje nieadnarazova zaklikali da čyścini i ŭstrymańnia, vystupajučy suprać seksu da šlubu i zdrady zakonnym mužu i žoncy. Facima, u pryvatnaści, praz sacsietki rekamiendavała studentkam «nie paddavacca spakusie raspusty». Palityk zaŭsiody nasiła tradycyjnyja musulmanskija stroi.
Mužčynu i žančynie było pradjaŭlenaje abvinavačvańnie ŭ adziultery, pakolki pazašlubny seks źjaŭlajecca kryminalna pakaralnym dziejańniem u Maroka (termin pazbaŭleńnia voli — da adnaho hoda). Bienchamadu taksama staviać u vinu sprobu podkupu słužbovych asob.
U jakaści apraŭdańnia žanaty baćka siemiarych dziaciej muła Amar raspavioŭ, što znachodzicca z aŭdaviełaj maci šaściarych dziaciej Facimoj u hramadzianskim šlubie, a z zakonnaj žonkaj nie žyvie.
Pradstaŭniki MUR zajavili, što ŭčynak adnapartyjcaŭ supiarečyć kaštoŭnaściam arhanizacyi.
U svaju čarhu, zakachanyja vykazali zdahadku, što stali achviaraj palityčnych intryh napiaredadni parłamienckich vybaraŭ, jakija projduć u kastryčniku 2016 hoda.
Partyja spraviadlivaści i raźvićcia — adna z najbujniejšych palityčnych partyj Maroka. Paŭstała ŭ siaredzinie 1960-ch jak palityčnaje kryło «Bratoŭ-musulman», pad sučasnaj nazvaj viadomaja z 1998 hoda. Vyjhrała vybary 2011 hoda ź isłamisckaj prahramaj, jakaja praduhledžvaje, u pryvatnaści, kansiervatyzm u sacyjalnaj palitycy.