U Biełarusi nieabchodna ŭvieści patentavuju sistemu dla samazaniatych. Z takoj inicyjatyvaj vystupiŭ staršynia Savieta Respubliki, były premjer-ministr Michaił Miaśnikovič 24 žniŭnia na pašyranym pasiadžeńni prezidyuma vierchniaj pałaty parłamienta.
«Treba, miarkuju, pierahledzieć isnujučy paradak, libieralizavać jaho i ŭvodzić dazvoł na samazaniataść, pierš za ŭsio patent dla samazaniataści, i vyznačyć pravavy status samazaniataha. Košt patenta samazaniataści moh by być blizkim da pamieru adzinaha padatku. Nieabchodnyja miery padtrymki samazaniataści: mikrakredytavańnie, biazvypłatnaje pradastaŭleńnie pamiaškańnia, kansultacyi», — zajaviŭ Miaśnikovič ŭ efiry telekanała STV.
Na dumku eks-premjera, takaja miera daść mahčymaść lehalizavać indyvidualnuju pracoŭnuju dziejnaść biez atrymańnia statusu indyvidualnaha pradprymalnika. «Rehistracyja praz kuplu patenta na samazaniataść biez pastanoŭki na ŭlik u jakaści biespracoŭnych prastymuluje pradprymalnickuju aktyŭnaść asob, jakija stracili pracu, vychad ź cieniu doŭhi čas nie pracujučych, ale uciahnutych u cieniavuju zaniataść ludziej», — cytuje Miaśnikoviča dziaržaŭnaje ahienctva BiełTA.
Staršynia Savieta Respubliki źviarnuŭ uvahu na toje, što termin «samazaniataść» u biełaruskim zakanadaŭstvie adsutničaje. Pavodle jaho słoŭ, da samazaniatych mohuć być adniesienyja asoby, jakija pracujuć pa zajaŭnym pryncypie biez rehistracyi ŭ jakaści IP, — ramieśniki, supracoŭniki śfiery ahraekaturyzmu, rabotniki asabistych padsobnych haspadarak, asoby, jakija zajmajucca prybirańniem, bytavymi pasłuhami. «Možna było b pašyryć vidy dziejnaści, dapoŭniŭšy pieraliki budaŭniča-mantažnymi, ramontnymi rabotami, pieravozkaj pasažyraŭ i hruzaŭ. Siońnia mnohija z hetych rabot u cieni, ludzi pry hetym nie abaronienyja, nie mohuć adstojvać svaje pazicyi ŭ sudzie», — adznačyŭ eks-premjer.
Staršynia Savieta Respubliki ŭpeŭnieny, što samazaniataść moža sumiaščacca i z asnoŭnaj pracaj pa pracoŭnaj damovie. Pry paśpiachovym viadzieńni biznesu samazaniataść zmoža pierajści da statusu IP, padkreśliŭ jon.
Košt patenta na samazaniataść možna nablizić da pamieru adzinaha padatku, ličyć Miaśnikovič. «Fiskalny efiekt budzie nievysokim, ale jon pierakryvajecca pa značnaści sacyjalnym efiektam. Samazaniaty nie budzie atrymlivać sacyjalnaj dapamohi, ale jon nie dehraduje, jon zabiaśpiečvaje siabie pracaj, kormić siamju, akazvaje značnyja pasłuhi abo vyrablaje zapatrabavanyja tavary. U sacyjalnym płanie jon nie biespracoŭny, što taksama važna dla čałavieka», — zajaviŭ Miaśnikovič.
Jon pryvioŭ u prykład ramiesnuju dziejnaść i padkreśliŭ, što ŭ krainie tolki 6,6 tys. ramieśnikaŭ. «Uźnikaje pytańnie, čamu nie atrymlivaje raźvićcio hetaja forma zaniataści. Na dumku MPZ, asnoŭnaja pryčyna — u žorstkich i nie zaŭsiody abhruntavanych patrabavańniach z boku ŭzhadniajučych arhanizacyj. Naprykład, kab pravodzić techabsłuhoŭvańnie i ramont aŭtatranspartnych srodkaŭ, fizičnaj asobie treba atrymać dzieviać uzhadnieńniaŭ, u tym liku ad sanitarnaj słužby, Minpryrody, Dziaržstandartu, Minhandlu, vykankamaŭ i hetak dalej», — skazaŭ śpikier SR NS.
