Ciapieraka ŭžo nichto nia pamiataje, jak i z čaho heta pačałosia. Kulturolahi spračajucca: adny rvuć na sabie majku jak dadatkovy arhument za toje, što fenomen naradziŭsia paśla 15‑ha vypusku bieskancovaj historyi ab toje, jak apazycyjanery chodziać pa hranty ŭ pradstaŭnictva ZŠA. Inšyja śćviardžajuć, što fatalnaj była 34‑ia seryja.
Tak ci inačaj, niečakana betešnyja strachotki pra admarozkaŭ pad ambasadaj stali nadzvyčajna papularnymi. U niadzieli pa viečarach vulicy byli pustyja, žančyny nia zvodzili vačej z apazycyjaneraŭ na ekranach. Z časam na seryjał, jaki ŭ narodzie nazyvali «Ambasada», «Apazycyja», «Na Staravilenskaj», taksama padsieli i mužyki.
Praryvu, adnak, nie było, kali b nie biznesoŭcy. Prasiaknuŭšysia kańjunkturaj, jany naładzili druk układyšaŭ z partretami lideraŭ apazycyi. Układyšy zapichvali ŭ humki, jakija zbyvali pa spekulacyjnych koštach. Školnikaŭ achapiła moda: kožny maryŭ sabrać poŭny nabor układyšaŭ — skład siabroŭ prezydyjumu ADS abo Sojmu BNF. Postery z vyjavaj Buchvostava zaniali miesca plakataŭ poruč ź Dzimaj Biłanam i dy Kapryjo ŭ pakojach dziaŭčynak. Małym śnilisia sny, u jakich jany i elehantny Šuškievič pišuć zajaŭku pa prahramie małych hrantaŭ i razam ramantyčnym nadviačorkam tupajuć na Staravilenskuju.
Ułady, jak zvyčajna, nie prarubili sytuacyju. Napiaredadni vybaraŭ u parlament aŭtamatyčna zapuścili čarhovy sezon «Ambasady».
Fatalnaja pamyłka! Ciapier papularnaści seryjału nie było ŭžo jak radańki dać: pastupova navat siarod vertykalščykaŭ pajšła moda prypadabniacca vonkava da hierojaŭ telesahi. Lidera nacyi ledź nie pierasmyknuła, kali padčas adviedak na Słuččynie ŭ niejkim kałhasie jaho sustreŭ žyvy Labiedźka (heta byŭ bryhadzir kambajnioraŭ, taksama fanat seryjału) z krykam: «Šanoŭny Alaksandar Ryhoryč, ja vas tut daŭno sa svaimi chłopcami čakaju!..»
Nia mienš cikavyja pracesy adbyvalisia ŭ mazhach apazycyjaneraŭ: spačatku jany pałachliva kidalisia ad dziaŭčynak, jakija filtravali ich kala vychadu ź siadziby. (A Vy b chiba nie ačmureli, kali b na vas ź dzikim jenkam kinuŭsia tynejdžar i pasprabavaŭ adadrać kavałak pinžaka na suvenir?) Spatrebiłasia paru miesiacaŭ, kab niavolnyja kumiry masaŭ adaptavalisia da novaha statusu.
Kampanii, jakija pracavali na biełaruskim rynku, tym časam zrazumieli, što pachody baćkafobaŭ pa hranty ŭ viačernim etery BT — fajny fint dla h.zv. «product placement» (latentnaja reklama). Chutka biełaruskija hledačy pabačyli, jak apazycyjanery chodziać pa hranty z pyłasmokami Bosh, patelniami Siemens i navat z kormam dla sabak. Paśla taho, jak apazycyjaner N. vyjšaŭ na špacyr da ambasady, łuščačy siemki AAT «Aljans», maštab prodažu «aljansaŭskaj» pradukcyi vyras utraja.
Ułady zabili tryvohu! Jakubovič i Jančeŭski vyrašyli arhanizavać sustreču z apazycyjanerami. Ich padstupny plan zaklučaŭsia ŭ tym, kab pierakanać ich chadzić u ambasadu ŭ cišotkach z nadpisam «Ja prosta idu pa hranty, nia majučy nijakaha intaresu da palityki».
Sustreča nie adbyłasia: Kalakin na toj čas adpačyvaŭ na Bahamach, Viačorka rabiŭ druhuju za hod plastyčnuju aperacyju, Statkieviča achapiŭ dziažurny tvorčy kryzis.
Sytuacyja była katastrafičnaja. U vyniku pasiedžańnia Rady biaśpieki pastanavili, kab da ambasady pajšoŭ Jon. Heta byŭ adzin sposab prymazacca da papularnaha šoŭ. Mabilizavaŭšy mazhavyja aktyvy, administracyja naradziła prajekcik pra nieabchodnaść vydańnia ŭ pasiołku Drazdy biuletenia pra prablemy adzinokich baćkoŭ. Mały hrant atrymaŭ padtrymku, i novy sezon «Ambasady» pačaŭsia ź źjaŭleńnia ŭ im novaha hieroja.
Publika z aściarožnaściu sustreła novy tvar. Jana tak upadabała starych vykanaŭcaŭ! Kinakrytyk Žbankoŭ pisaŭ: «Nia vieru! Navičku vidavočna nie chapaje plastyki i psychalahičnaj hłybini. Kali milicyja zabiraje ŭ jaho hrošy, u jaho vačach niama patasu žachu, jaki my bačyli ŭ vykanańni pradstaŭnikoŭ staroj škoły!»
I tolki «SB» vitała źjaŭleńnie novaha aktora. Redakcyja arhanizavała kruhły stoł ekspertaŭ, jakija raili BT dać u papularnym seryjale darohu maładym. Na nastupny dzień dyrekcyja BT zajaviła, što ŭ metach padtrymki pierajemnaści najlepšych tradycyj biełaruskaj kultury ŭ nastupnym sezonie pastanavili całkam źmianić aktorski skład «Ambasady». Užo viadomyja imiony novych vykanaŭcaŭ apazycyjaneraŭ, jakija buduć chadzić pa hranty: Sidorski, Navumaŭ, Radźkoŭ.
Pahladzim, ci prymie ich publika ŭ svaim ulubionym seryjale?
Darečy, na Feliksie kažuć, što na «Biełaruśfilmie» zmajstravali kopiju — mulaž amerykanskaj ambasady. Tulajučysia vakoł jaho, maładyja aktory šlifujuć svajo majsterstva.
