Astraviec — atamnaja stalica Biełarusi. Z pačatkam budaŭnictva AES horad pačaŭ raści. Ciapier u Astraŭcy pražyvaje kala 10 tysiač čałaviek, a da 2020 hoda nasielnictva maje pavialičycca da 22 tysiač. Užo budujucca novyja damy, šmat mašyn ź litoŭskimi, rasijskimi i troški z ukrainskimi numarami. U horadzie pakul adzin hatel, adna piceryja i restaran. Ale ŭvohule horad vyhladaje zvonku dahledžana, akuratna, ź jeŭrapiejskimi notkami.
Mierkavańni astraŭčan padzialilisia: kamuści strašna ad novaj stancyi, chtości narešcie znajšoŭ sabie rabotu. My parazmaŭlali ź miascovymi žycharami i znajšli žančynu, jakaja pracuje na AES i raspaviała nam, što zdaryłasia z reaktaram:
U noč z 9 na 10 lipienia na Astravieckaj AES pry praviadzieńni padrychtoŭčych rabot korpus reaktara abrynuŭsia z vyšyni 2—4 mietraŭ. Praz dva tydni Ministerstva enierhietyki zajaviła ab niaštatnaj situacyi «na placoŭcy zachoŭvańnia korpusa reaktara pry praviadzieńni takiełažnych prac pa jaho pieramiaščeńni ŭ haryzantalnaj płoskaści».
1 žniŭnia pradstaŭnik karparacyi «Rasatam» Alaksandr Łakšyn pryznaŭ, što ŭ noč z 9 na 10 lipienia adna z subpadradnych arhanizacyj pry pieramiaščeńni korpusa reaktara dapuściła adchileńni ad instrukcyi, praź jakija adbyŭsia pierakos hruzu pry jaho ŭzdymie.
Žančyna, jakaja pracuje na stancyi, raspaviała nam svaju viersiju taho, što adbyłosia:
«Rabočyja na AES kažuć, što dniom byli pieraboi sa śviatłom. Užo tady pačali ŭstaloŭku reaktara [Tut i dalej — korpusa reaktara. — Aŭt.], ale zvaliŭsia jon unačy, prykładna a pałovie na druhuju. Stropy, na jakich trymaŭsia reaktar, akazalisia karaciejšyja na 30 santymietraŭ čym tady, kali zamiarali ŭ Rasii. Z-za hetaha reaktar pačaŭ adchilacca. Adzin bok adychodziŭ na mietr, a druhi na piać. Cełuju hadzinu jon trymaŭsia ŭ pavietry. A paśla prosta zvaliŭsia. Ja nie była padčas taho, jak jon ruchnuŭ, ale rabočyja, jakija pracavali ŭ načnuju źmienu, skazali, što hrukat byŭ vialiki. Hety ž reaktar važyć 330 ton! Chłopcy, jakija stavili reaktar, kazali, što ŭsio stavili pa praviłach.
Usio heta dziŭna, bo reaktar tak abśledavali, śpiecyjalisty z «Rasatama» vyvučali… Dva ci try miesiacy pierad ustanoŭkaj inžyniery słuchali hety korpus i kazali, što tam niešta nie prasłuchoŭvałasia. Navat biez zapraŭki ŭranam jon vydaje dziŭnyja šumy. Kali rychtavali šachtu, to nie dapuskali pahrešnaść navat da 6 milimietraŭ. A tut upaŭ, absurd niejki.
Kali ja ranicaj pryjšła na pracu, dyk užo ŭsio schavali. Jany znoŭ naciahnuli jaho na raniejšaje miesca, ale bačna, što korpus ciapier kryva staić. Na AES kažuć pra mahčymuju sudovuju spravu.
Ruskija tam karali ciapier. Dla biełarusaŭ heta nizaść. Tam jość dva budynki — adzin rasijskaha boku, druhi — biełaruskaha. Dyk voś, biełaruskija zvarščyki atrymlivajuć 4 miljony, a kali na ruskich pracavać, to zarobak budzie 10—12 miljonaŭ. Jak tolki pačynałasia budaŭnictva, zarobki va ŭsich byli značna bolšyja. Ci jany hrošy paraźbirali, ci kryzis vinavaty, nichto nie viedaje. Ale i za nievialikija hrošy biełarusy hatovyja tam pracavać. Pry hetym navat na praktyku pryvoziać studentaŭ z «Rasatama», a ź biełarusaŭ tolki adnaho viedaju.
U nas kitajcy zajmajucca praviadzieńniem linij elektrapieradač. Jašče AES nie dabudavali, a ŭžo pravodziać elektryčnaść. I voś jany voziać piasok, słupy. Ad AES płanujecca pravieści linii da vioski Soły, na Vałožyn, častku razhalinavańnia na Hrodna. Reaktar valicca, a jany ŭžo kantrakty padpisvajuć».
