Vosiem kryminalnych spraŭ raspačata ŭ dačynieńni da 34-hadovaha minčuka, jaki padazrajecca va ŭciahvańni žančyn u zaniatak prastytucyjaj, paviedamili ŭ adździaleńni infarmacyi i hramadskich suviaziej UUS Minabłvykankama.
Spačatku mužčyna zajmaŭsia lehalnaj pradprymalnickaj dziejnaściu. Adnak paśla niaŭdač u biźniesie jon u kancy 2014 hoda zaniaŭsia suteniorstvam.
Mužčyna vierbavaŭ prastytutak i stvaraŭ im umovy dla pracy. Z pavieličeńniem dachodaŭ ad intymnaha biźniesu jon staŭ zaprašać da siabie na pracu dziaŭčat na sajtach znajomstvaŭ, jakija prachodzili asabisty kastynh. Minčuk prapanoŭvaŭ im dapamohu na starcie «karjery».
Dla taho, kab pavysić svoj status, pradprymalnik raspaviadaŭ padapiečnym ab naładžvańni kantaktaŭ z uładalnikami papularnaha tematyčnaha sajta, raźmiaščeńnie ankiet na jakim vyviedzie ich zarobki na novy ŭzrovień. Sabraŭšy intymnyja sełfi svaich supracoŭnic, mužčyna prademanstravaŭ im ich ankiety na zhadanym sajcie, za što braŭ 50% ad hanararaŭ dziaŭčat.
Da pačatku hetaha hoda atrymany dachod dazvoliŭ by fihurantu adkryć lehalny kvietkavy biźnies, jaki byŭ u jaho płanach. Hulca na rynku akazańnia seks-pasłuh svoječasova zaŭvažyli apieratyŭniki adździeła pa supraćdziejańni handlu ludźmi UUS Minskaha abłvykankama. Usie schiemy i biźnies-idei kambinatara fiksavalisia pravaachoŭnikami, jakija pakłali kaniec hetamu pradpryjemstvu.
